Tender për perde dielli, ndërsa miliona euro përfundojnë te partneri privat i Ministrisë

Ministri i Mbrojtjes, Ermal Nufi, mori detyrën në mars 2026 me premtimin për reformimin e administratës, zhvillimin e industrisë ushtarake dhe forcimin e transparencës në sektorin e mbrojtjes. Por, sipas dokumenteve të prokurimit publik, një nga procedurat e para të ndërmarra nga kabineti i tij nuk lidhet me modernizimin e kapaciteteve ushtarake apo me eficiencën e institucionit, por me pajisjen e zyrës së ministrit dhe sekretares me perde të reja kundër diellit.

Më 17 korrik 2026, Ministria e Mbrojtjes zhvilloi një procedurë prokurimi me objekt “Blerje tendash të brendshme rolo-perde dritaresh kundër diellit”, me ngjyra të bardha dhe gri, për gjashtë dritare, sipas specifikimeve teknike të publikuara në dokumentacion.

Në vetvete, blerja e perdeve nuk përbën shkelje ligjore. Çdo institucion ka nevoja të mirëmbajtjes. Por problemi lind kur kjo procedurë vendoset në kontrast me retorikën publike të ministrit për reforma, kursim dhe eficiencë administrative. Pas vetëm pak muajsh në detyrë, prioriteti i parë i dukshëm rezulton të jetë komoditeti i zyrës ministrore.

Në të njëjtën kohë, Ministria e Mbrojtjes ka firmosur edhe kontrata shumë më të mëdha financiare.

Një prej tyre është kontrata me vlerë rreth 12 milionë euro për furnizim me mjete dhe pajisje ushtarake, e fituar nga kompania Timak Defence, në pronësi të biznesmenit izraelit Ron Yeffet.

Ky fakt merr rëndësi të veçantë për shkak se Timak Defence rezulton partnere e kompanisë shtetërore “KAYO”, që kontrollohet nga vetë Ministria e Mbrojtjes, duke ngritur pikëpyetje mbi mënyrën se si menaxhohen marrëdhëniet mes kompanive private dhe strukturave shtetërore në sektorin e mbrojtjes.

Kjo krijon një kontrast të fortë: nga njëra anë procedura për perde dielli për zyrat drejtuese, ndërsa nga ana tjetër kontrata shumëmilionëshe në një sektor ku transparenca dhe shmangia e konfliktit të interesit duhet të jenë standard maksimal.

Pyetja që shtrohet është nëse “reforma” e premtuar po matet me ndryshimin e ambienteve të zyrës apo me mënyrën se si administrohen fondet publike dhe kontratat strategjike të Ministrisë së Mbrojtjes.

Në një kohë kur buxheti i mbrojtjes është rritur ndjeshëm dhe Shqipëria ka marrë angazhime të reja në kuadër të NATO-s, opinioni publik pret më shumë përgjigje për kontratat milionëshe sesa për perdet që mbrojnë zyrën e ministrit nga dielli.