Fluks rekord në kulmin e sezonit turistik, Skënder Hita zbarkon në Rinas

Në kulmin e sezonit turistik, kur Aeroporti Ndërkombëtar “Nënë Tereza” po përballet me një nga periudhat më intensive të hyrje-daljeve, drejtuesit kryesorë të Policisë së Shtetit dhe Doganave kanë zbritur në terren për të parë nga afër menaxhimin e situatës.

Drejtori i Përgjithshëm i Policisë së Shtetit, Skënder Hita, së bashku me Drejtorin e Përgjithshëm të Doganave, Besmir Beja, zhvilluan një inspektim të përbashkët në Rinas, me fokus verifikimin e masave të ndërmarra për përballimin e fluksit të lartë të pasagjerëve.

Sipas të dhënave zyrtare, në këtë pikë kufitare po përpunohen çdo ditë nga 50 mijë deri në 56 mijë udhëtarë. Strukturat e Policisë Kufitare dhe Doganës janë angazhuar për të garantuar jo vetëm lëvizje të shpejtë, por edhe standarde të larta sigurie.

Gjatë inspektimit, Hita nënvizoi se përballimi i këtij fluksi po bëhet i mundur falë masave organizative dhe përmirësimeve teknike të ndërmarra në kohë.

“Gjatë sezonit turistik, të gjitha shërbimet e Policisë Kufitare kanë kaluar në regjim shërbimi 12-orësh, duke rritur me rreth 20% praninë e punonjësve në aeroportin ndërkombëtar të Rinasit”, u shpreh ai.

Një nga ndryshimet më të rëndësishme, sipas tij, është zgjerimi i përdorimit të sistemit automatik të kontrollit kufitar, i cili ka ndikuar drejtpërdrejt në uljen e kohës së pritjes.

“Është ulur nga 16 në 12 vjeç mosha minimale e përdoruesve të sistemit të kontrollit automatik e-Gate, duke rritur ndjeshëm numrin e pasagjerëve që përpunohen në mënyrë automatike dhe duke shkurtuar kohën e pritjes”, tha Hita.

Ai bëri të ditur gjithashtu se janë ndërmarrë hapa konkretë për modernizimin e infrastrukturës teknologjike në pikën kufitare. Përditësimi i sistemit TIMS dhe zëvendësimi i pajisjeve të kontrollit synojnë rritjen e shpejtësisë dhe cilësisë së shërbimit për qytetarët dhe turistët.

Në të njëjtën kohë, drejtuesi i Policisë së Shtetit theksoi se, përveç menaxhimit të fluksit, një prioritet i pandryshuar mbetet lufta ndaj krimit ndërkufitar.

“Policia Kufitare është angazhuar maksimalisht për të garantuar përpunim të shpejtë dhe të sigurt të pasagjerëve, ndërsa paralelisht vijojnë kontrollet e bazuara në analizën e riskut për goditjen e çdo aktiviteti kriminal”, vijoi ai.

Sipas tij, bashkëpunimi i ngushtë me Drejtorinë e Përgjithshme të Doganave ka sjellë rezultate konkrete në luftën kundër trafikut të lëndëve narkotike, kontrabandës dhe migracionit të paligjshëm.

“Bashkëpunimi me Drejtorinë e Përgjithshme të Doganave ka sjellë rezultate konkrete në goditjen e trafikut të lëndëve narkotike, kontrabandës dhe migracionit të paligjshëm, duke garantuar një nivel të lartë sigurie në Pikën e Kalimit Kufitar Rinas”, deklaroi ai.

Në përmbyllje, Hita garantoi se Policia e Shtetit do të vijojë të jetë plotësisht në shërbim të qytetarëve dhe turistëve gjatë gjithë sezonit veror.

“Policia e Shtetit mbetet plotësisht e përkushtuar për t’i ofruar çdo qytetari dhe turisti siguri, ndihmë dhe shërbim cilësor gjatë hyrjes dhe daljes nga territori i Republikës së Shqipërisë”, përfundoi ai.