UÇK-ja nuk ishte në gjyq, aktgjykimi nuk shfajëson krimet e regjimit jugosllav

Franca dhe Gjermania kanë reaguar pas shpalljes së aktgjykimit ndaj ish-drejtuesve të Ushtrisë Çlirimtare të Kosovës (UÇK), duke theksuar rëndësinë e respektimit të procesit gjyqësor dhe duke bërë njëkohësisht të qartë se vendimi nuk duhet interpretuar si mohim i krimeve të kryera gjatë luftës në Kosovë.

Në reagimin e saj zyrtar, Franca vuri në dukje se vendimi i Dhomave të Specializuara mund të ankimohet dhe se me të përmbyllet faza e proceseve të shkallës së parë për çështjet përkatëse, me përjashtim të rasteve që lidhen me pengimin e administrimit të drejtësisë.

Parisi rikonfirmoi gjithashtu mbështetjen për Dhomat e Specializuara të Kosovës dhe angazhimin e saj në luftën kundër pandëshkueshmërisë. Në të njëjtën kohë, Franca theksoi se qëndrimi i saj ndaj pavarësisë së Kosovës dhe institucioneve të saj mbetet i pandryshuar.

Ndërkohë, një mesazh të rëndësishëm përcolli edhe ambasadori gjerman në Prishtinë, Reiner Rudolph.

Ai theksoi se Ushtria Çlirimtare e Kosovës nuk ishte subjekt i gjykimit dhe se as synimi i saj për një Kosovë të pavarur nuk ishte objekt i këtij procesi.

Sipas ambasadorit gjerman, aktgjykimi nuk ndryshon përgjegjësinë që mbajnë aktorët jugosllavë për konfliktin e armatosur dhe shkeljet e rënda të të drejtave të njeriut ndaj popullsisë së Kosovës.

Rudolph rikujtoi se gjatë fundit të viteve ’90, populli i Kosovës u përball me shkelje të gjera të të drejtave të njeriut, të cilat janë trajtuar edhe në procese të tjera ndërkombëtare dhe që u bënë një prej faktorëve të ndërhyrjes së bashkësisë ndërkombëtare.

Në këtë kuadër, Gjermania nënvizon se vendimi i Dhomave të Specializuara duhet parë brenda kufijve të mandatit të kësaj gjykate dhe nuk përbën një rivlerësim të të gjithë historisë së luftës në Kosovë.

Qëndrimet e Parisit dhe Berlinit vijnë në një moment kur aktgjykimi ndaj ish-krerëve të UÇK-së ka rikthyer në qendër të debatit publik në Kosovë dhe më gjerë çështjen e përgjegjësisë individuale për krimet e pretenduara, por edhe kontekstin e luftës dhe krimeve të kryera ndaj popullsisë civile kosovare.