Franca përmend edhe dy kushte: Gjyqësori dhe Parlamenti duhet…

Franca mendon se në Shqipëri duhet të bëhet më shumë në lidhje me funksionimin e Parlamentit dhe gjyqësorit, në mënyrë që të plotësohen kriteret për hapjen e bisedimeve të bisedimeve.

Kështu u shpreh ambasadori francez në Beograd, Frederic Mondoloni, ndërsa foli në Forumin e Sigurisë që mbahet në Serbi.

Kështu pas Presidentit Emmanuel Macron që përmendi çështjen e azilkërkuesve nga Shqipëria si një shqetësim kryesor për vendin e tij, pasi shqiptarët renditen të dytët në numrin e kërkesave për azil, diplomati francez tha se vendet e Ballkanit Perëndimor, por edhe vetë BE duhet të reformohen.

“Ne mendojmë se negociatat me vendet e Ballkanit Perëndimor duhet të jenë më graduale, por më konkrete, që do të thotë se këto shtete mund të përfshihen në disa nga politikat e BE edhe përpara anëtarësimit të plotë.

Në Këshillin Europian disa vende janë për hapjen e negociatave, si për Maqedoninë e Veriut ashtu edhe për Shqipërinë, disa janë për hapjen e negociatave vetëm për njëri vend ndërsa disa të tjerë kundër ndarjes së dy shteteve. Na duhet më shumë kohë për të arritur një marrëveshje për këtë çështje”, tha ai.