Gaz Bardhi replikon nga Amerika me Grida Dumën

Gaz Bardhi ka replikuar me sms me moderatoren e TOP STORY, Grida Duma. – Qenka lodhur shumë Grida sot. E gjithë dita e saj shkoi duke analizuar një dokument, me të ftuar që as e dinë çfarë flasin dhe as kuptojnë çfarë lexojnë. Thjesht recitojnë çfarë u kanë dhënë në letër. Ndërkohë, në emër të sensacionit të rremë, shfrytëzohet hapësira kombëtare mediatike për të ushqyer publikun me një gënjeshtër të pastër  një “më thotë dikush” e servirur si të ishte provë.

Ajo që nuk u tha në studio është se reagimi zyrtar mbi këtë çështje është dhënë që në mëngjes, pas një keqinterpretimi identik nga një tjetër ekran televiziv. Por Grida dhe ekipi i saj në panel bënë sikur nuk e panë. Arsyeja është e thjeshtë: nuk i intereson e vërteta, por narrativi i gënjeshtër që u shkon për shtat.

E vërteta është krejt e kundërta e asaj që u shit me pompozitet në studio. Dokumenti zyrtar, i depozituar në Komisionin e Ekonomisë dhe i paraqitur sot në seancë, përmban versionin final të amendamentit, ku përcaktohet qartë se shoqëritë tregtare që shfrytëzojnë fushat naftëmbajtëse në Shqipëri përjashtohen automatikisht nga përfitimet e ligjit, pavarësisht nëse janë apo jo nën hetim. Pra, amendamenti pikërisht synon të mbyllë çdo derë për abuzim  jo të hapë rrugë për favore, siç u inskenua live në transmetim.

Pavarësisht se faktet janë të shkruara bardhë e zi, në një dokument të firmosur dhe të depozituar zyrtarisht, Grida dhe paneli vazhduan për minuta të tëra si të kishin zbuluar Amerikën. Por tashmë kjo nuk është surprizë. Gënjeshtrat e saj në një TV kombëtar janë bërë rutinë; aq shpesh përsëriten sa e vetmja gjë që mbetet është të qeshësh me to  me qesharakërinë e tyre dhe me bindjen naive se po barazojnë të tjerët me standardet e tyre të ulëta.

p.s. Falë distancës kohore, gënjeshtrat nga Shqipëria mbërrijnë me vonesë në SHBA. Por kur vijnë, të paktën sjellin humor.