Gjikuria merr 2 milionë € për të ndërtuar rrugën e kompleksit të tij në Palasë

Një tender me vlerë rreth 2 milionë euro i zhvilluar nga Bashkia e Himarës po ngre pikëpyetje mbi destinacionin real të një investimi publik në zonën e Gjilekës. Bëhet fjalë për ndërtimin e një aksi rrugor që, sipas dokumenteve të tenderit, do të lidhë zonën e Impiantit të Gjilekës me rrugën nacionale, në një territor ku po zhvillohen disa komplekse të mëdha turistike dhe rezidenciale.

Në këtë zonë operon prej vitesh kompania “Gjikuria”, e cila është shpallur në dy raste Investitor Strategjik për projekte në Palasë dhe Gjilekë. Në të njëjtën hapësirë, kompania ka përfituar edhe kontrata publike për furnizimin me ujë dhe ndërhyrje të tjera infrastrukturore.

Kjo krijon një situatë që ngre pikëpyetje mbi mënyrën se si po ndërthuren investimet private me shpenzimet publike në një prej zonave më të lakmuara të bregdetit shqiptar.

Sipas dokumenteve të bëra publike dhe të shqyrtuara për këtë rast, shteti ka vënë në dispozicion truall publik për investime strategjike, ka parashikuar lehtësi fiskale për investitorin, ndërsa pushteti lokal dhe institucionet publike kanë financuar ose po financojnë ndërhyrje infrastrukturore në të njëjtën zonë.

208 milionë lekë për rrugën në Gjilekë

Më 10 gusht 2026, Bashkia e Himarës shpalli fituesin e procedurës me objekt “Rikonstruksioni i rrugës lidhëse të impiantit Gjilekë me rrugën nacionale”.

Fondi limit i tenderit është 208 milionë lekë dhe financimi është parashikuar të shtrihet në dy vite. Për vitin 2026 janë planifikuar 83 milionë lekë, ndërsa për vitin 2027 parashikohet të shpenzohen 125 milionë lekë.

Afati i realizimit të punimeve është përcaktuar 18 muaj.

Në garë kanë marrë pjesë disa kompani. “Be Is” ka paraqitur një ofertë prej 184 milionë lekësh, “Fusha” një ofertë prej 198 milionë lekësh, ndërsa “Gjikuria” ka ofruar 184 milionë lekë, pra rreth 2 milionë euro.

Faksimile: Njoftimi i fituesit të tenderit për rrugën në zonën e Gjilekës, Himarë, për komplekset turistike

Një element tjetër që tërheq vëmendjen është fakti se procedura është finalizuar nga Sekretari i Përgjithshëm i Bashkisë së Himarës, Pervin Gjikuria.

Në dokumentet shoqëruese të tenderit përcaktohet se Bashkia e Himarës ka një sipërfaqe prej 571.94 km² dhe një popullsi prej 7,818 banorësh.

Por ajo që është veçanërisht e rëndësishme për destinacionin e kësaj rruge lidhet me përshkrimin teknik të projektit.

Dokumentet bëjnë të ditur se aksi i ri do të nisë pranë rrugës ekzistuese “Palasë–Dhërmi” dhe do të zbresë në drejtim të zonës së Impiantit të Trajtimit të Ujërave të Palasës.

“Gjurma ku parashikohet të kalojë segmenti rrugor, paraqitet në gjendje natyrore dhe ka një gjatësi totale rreth 1000 m”, përcaktohet në dokumentacion.

Në foto: Gjurma e rrugës që do të ndërtohet, pranë dise komplekseve të banimit

Një rrugë e re në një zonë me komplekse turistike

Dokumentet e projektit tregojnë se rruga nuk është thjesht një ndërhyrje rehabilituese mbi një aks ekzistues. Segmenti prej rreth 1 kilometër parashikohet të ndërtohet kryesisht në gjurmë të re, në një terren kodrinor dhe në pjesën më të madhe pranë përroit.

Sipas përshkrimit teknik, ndërhyrja synon të krijojë një infrastrukturë të përshtatshme për qarkullimin e automjeteve, si dhe kushte më të mira për lëvizjen dhe sigurinë e këmbësorëve.

Por dokumentet japin edhe një tjetër të dhënë të rëndësishme për karakterin e zonës.

Territori përshkruhet si një hapësirë me ritme të larta zhvillimi turistik dhe rezidencial, ku po ndërtohen komplekse të mëdha banimi.

“Zona në të cilën do të shtrihet projekti është rreth 1000 ml. Segmenti rrugor që do të ndërtohet shtrihet pothuajse në të gjithë gjatësinë e tij në gjurmë të re, pjesa më e madhe e së cilës në krah të përroit. Relievi është kodrinor ku bimësia është e pranishme edhe në formën e pemëve të larta. Zona përreth është një zonë me ritme të larta zhvillimi turistik por edhe residencial në formën e komplekseve të mëdha të banimit”, thuhet në dokumentacion.

Në foto: Gjendja e vendit ku do të ndërtohet rruga në Gjilekë

Harta e paraqitur nga Bashkia tregon gjithashtu pozicionimin e aksit të ri pranë përroit dhe komplekseve turistike që po ndërtohen në këtë zonë, disa prej të cilave janë pjesë e investimeve të kompanisë “Gjikuria”.

Kjo është pikërisht pika ku investimi publik në infrastrukturë kryqëzohet me zhvillimet private në territor.

Nuk është vetëm rruga: ujësjellës, kanalizime dhe hidrantë

Projekti nuk kufizohet vetëm te ndërtimi i rrugës.

Në dokumentet teknike parashikohet nevoja për krijimin e një rrjeti të ri të kanalizimeve të ujërave të zeza, duke qenë se segmenti do të ndërtohet kryesisht në një gjurmë të re dhe nuk ekziston një rrjet i mëparshëm që mund të shfrytëzohet.

Dokumentacioni thekson se gjatë hartimit të projekt-zbatimit duhet të merret në konsideratë perspektiva e zhvillimit të rrugës dhe e zonës, si dhe drejtimi i zhvillimit urbanistik të territorit.

Në kuadër të së njëjtës ndërhyrje parashikohen gjithashtu rrjete të ujësjellësit, linja të reja hidrantësh për mbrojtjen nga zjarri, si dhe ndërhyrje të tjera infrastrukturore.

Projekti përfshin edhe mundësinë e ndërtimit të rrethrrotullimeve, ndriçimit dhe gjelbërimit, duke e kthyer ndërhyrjen në një paketë më të gjerë infrastrukturore për këtë territor.

Pra, fondi prej 208 milionë lekësh nuk lidhet vetëm me asfaltimin e një segmenti rrugor, por me krijimin e një infrastrukture të re që përfshin disa komponentë të zhvillimit urban të zonës.

Gjikuria, edhe kontrata për ujësjellësin

Ky nuk është rasti i parë kur kompania “Gjikuria” përfiton një kontratë publike në të njëjtën hapësirë ku ka zhvillime të rëndësishme private.

Në fillim të vitit 2024, Agjencia Kombëtare e Ujësjellës-Kanalizimeve shpalli fituesin e tenderit me objekt “Furnizimi me ujë të zonave bregdetare, Zonat e Investimit Strategjik Draleos, Drimadhes dhe Dhërmi, Faza e Parë”.

Në këtë procedurë, kompania “Gjikuria” paraqiti një ofertë prej 679 milionë lekësh dhe u shpall fituese, megjithëse oferta e saj nuk ishte më e ulëta.

Kështu, në të njëjtën zonë ku kompania ka projekte të mëdha private, ajo është përfshirë edhe në realizimin e infrastrukturës publike të ujësjellësit.

Dy herë Investitor Strategjik

Raporti mes kompanisë “Gjikuria” dhe zonës nuk kufizohet te kontratat publike.

Shteti shqiptar e ka shpallur kompaninë në dy raste Investitor Strategjik për projekte të zhvilluara në këtë territor.

Vendimi i parë, me numër 10/8, lidhet me projektin e investimit me potencial strategjik “Coast to Coast”, i cili ka marrë mbështetje edhe nga Agjencia për Zhvillim Bujqësor dhe Rural.

Në dokumentacionin përkatës përcaktohet se projekti parashikon ndërtimin e një kompleksi me tre hotele dhe vila rezidenciale, në një sipërfaqe trualli prej 20.9 hektarësh në zonën kadastrale 1739, në Himarë.

Faksimile: AIDA në vitin 2021 dhe 2023 shpalli firmën “Gjikuria” Investitor Strategjik në Palasë

Më pas, me një tjetër vendim, me numër 34/11, të datës 1 gusht 2023, AIDA e ka shpallur sërish kompaninë Investitor Strategjik, këtë herë për projektin “White Roads Hotel”.

Në të dyja rastet bëhet fjalë për investime të planifikuara në zona bregdetare me vlerë të lartë turistike, ku kompania ka përfituar statusin e investitorit strategjik dhe akses në truall shtetëror.

Sipas dokumenteve të referuara, bëhet fjalë për mijëra metra katrorë tokë publike në bregdetin e Jonit, të vënë në dispozicion të projekteve strategjike me çmim simbolik prej 1 euro.

Një rreth që ngre pikëpyetje

Në pamje të parë kemi një kompani që zhvillon projekte turistike dhe rezidenciale, fiton statusin e Investitorit Strategjik, merr në përdorim truall shtetëror për projektet e saj dhe, paralelisht, përfiton kontrata publike për infrastrukturën në të njëjtën zonë.

Tani, Bashkia e Himarës po investon 208 milionë lekë për një aks të ri rrugor që kalon pranë një zone me zhvillim intensiv turistik dhe rezidencial, ku ndodhen edhe komplekse të lidhura me aktivitetin e “Gjikurisë”.

Për më tepër, dokumentet e tenderit e përshkruajnë qartë territorin si një zonë ku po zhvillohen komplekse të mëdha banimi dhe ku nevojiten rrjete të reja ujësjellësi, kanalizimesh, hidrantësh, ndriçimi dhe infrastrukture rrugore.

Kjo ngre një pyetje thelbësore: ku përfundon infrastruktura publike dhe ku fillon shërbimi ndaj investimeve private?

Vetë fakti që një investim publik ndodhet pranë komplekseve të mëdha turistike nuk provon në vetvete një favorizim apo shkelje ligjore. Megjithatë, ndërthurja e statusit strategjik, përdorimit të tokës publike, kontratave të mëparshme dhe investimit të ri publik në të njëjtën zonë kërkon transparencë të plotë mbi arsyetimin e projektit, përfituesit e drejtpërdrejtë dhe mënyrën se si janë përcaktuar prioritetet e shpenzimit të parave publike.

Në një zonë ku investimet private kanë marrë përmasa të mëdha, pyetja që mbetet për t’u sqaruar është nëse infrastruktura po ndërtohet në funksion të nevojave të komunitetit dhe zhvillimit të përgjithshëm të territorit, apo nëse një pjesë e saj përfundon duke rritur drejtpërdrejt vlerën dhe aksesin e projekteve private.

Dokumentet e tenderit, në çdo rast, ofrojnë një panoramë të qartë të një investimi publik të konsiderueshëm në një territor ku “Gjikuria” ka interesa të mëdha private dhe ku më herët ka përfituar statusin e Investitorit Strategjik dhe kontrata të tjera publike.