Gjykata e Shkodrës vendos të ekstradojë rusin e shumëkërkuar

Gjykata e Shkodrës ka pranuar kërkesën e Rusisë për të ekstraduar shtetasin  rus, Igor  Kokunov, i cili akuzohet  për veprën penale të marrjes së detyrave në hierarkinë e lartë të strukturave kriminale në Rusi.

Kujtojmë që 59-vjeçari kërkoi azil politik në Shqipëri, me pretendimin se në Rusi i rrezikohet jeta, por gjykata vendosi për ekstradim.

Vepra penale për të cilën akuzohet Kokunov parashikon maksimumin e dënimit 15 vjet burg.

Operacioni për kapjen e tij u kodua “Moscow” dhe u zhvillua nga policia kufitare Muriqanit dhe policia së Shkodrës, në bazë të informacioneve të shkëmbyera ndërmjet Interpol Tiranës dhe Interpol Moskës.

Kush është bosi i krimit “Igor Kokunov”

Bosi i krimit Igor Kokunov, i njohur gjithashtu si “Vasya Bandit”, u arratis më 22 shkurt të vitit 2022 nga arresti shtëpiak në pritje të gjykimit, njoftonin gazetat ruse.

Kokunov akuzohet për krime të tilla si rrëmbimi, zhvatja, grabitja, mashtrimi dhe organizimi i biznesit të paligjshëm.

Vasya Bandit u arrestua nga autoritetet ruse në qershor të vitit 2020, ai gjithashtu akuzohet për koordinimin e kriminelëve në rajonet Sergiev Posad, Chekhov dhe Podolsk të rajonit të Moskës prej 27 vitesh.