Greqia ndalon përdorimin e rrjeteve sociale nën moshën 15 vjeç

Greqia ka vendosur të ndërmarrë një hap të fortë në drejtim të mbrojtjes së të miturve në hapësirën digjitale, duke paralajmëruar kufizimin e aksesit në rrjetet sociale për fëmijët nën moshën 15 vjeç.

Njoftimi është bërë nga kryeministri Kyriakos Mitsotakis, i cili theksoi se masa konsiderohet e vështirë, por e nevojshme për të adresuar ndikimet që platformat sociale kanë tek të rinjtë. Sipas tij, rregullorja do të nisë të zbatohet gjatë verës së vitit 2026, ndërsa hyrja e plotë në fuqi është parashikuar për 1 janar 2027.

Vendimi synon të kufizojë përdorimin e mediave sociale nga fëmijët, duke i mbrojtur ata nga rreziqe si varësia digjitale, përmbajtjet e papërshtatshme dhe ndikimet negative në shëndetin mendor. Autoritetet greke e shohin këtë si një hap të rëndësishëm drejt krijimit të një mjedisi më të sigurt online për brezat e rinj.

Me këtë iniciativë, Greqia synon të pozicionohet ndër vendet e para në Evropë që vendosin kufizime të qarta ligjore për përdorimin e rrjeteve sociale nga të miturit, duke hapur një debat më të gjerë mbi rregullimin e teknologjisë dhe mbrojtjen e fëmijëve në epokën digjitale.