Grida Duma zbulon “lojën e fshehtë” mes Ramës dhe Braçes

Grida Duma, ka komentuar zhvillimet e fundit brenda Partia Socialiste, gjatë një interviste në emisionin “Breaking”.

Duma u ndal veçanërisht te debatet e brendshme në PS dhe te qëndrimet e deputetit Erion Braçe, i cili së fundmi ka vetëshpallur kandidaturën për të garuar për Bashkinë e Tiranës.

Sipas saj, kritikat e Braçes ndaj qeverisë nuk janë thjesht qëndrime individuale, por duhen parë në një këndvështrim më të gjerë politik. Ajo theksoi se kryeministri Edi Rama e lejon këtë lloj zëri kritik brenda partisë për të krijuar perceptimin e pluralizmit të brendshëm.

“Braçe e ka ndërtuar profilin e tij, është aftësia e tij politike. Braçe e di shumë mirë kush është vija e kuqe. Rama e lejon Braçen të ekzistojë dhe e ka alibi atë për të thënë: ‘Doni të thoni gjëra? Ja ku e kam Braçen’. Pushteti që ka PS me Ramën është një pushtet që do kërkonte kontroll si nga brenda dhe nga jashtë”, u shpreh Duma.

Ajo shtoi më tej se debatet e brendshme në PS, sipas saj, janë më shumë një “teatër politik” i ndërtuar nga vetë Rama për të krijuar idenë e ndryshimit te opinioni publik.

“Këtu e kemi të qartë që kemi të bëjmë me një teatër, që po ua servir shqiptarëve si një i gjithëpushtetshëm. Këto konflikte i ka marioneta dhe ia jep këtu popullit sikur erërat po ndryshojnë, por nuk ndryshon asgjë. Askush nuk po e kontrollon dhe nuk e kërcënon Edi Ramën nga brenda. Shqetësimi im për Shqipërinë dhe për zhbalancat në PS janë të mëdha se në PD”, theksoi Duma.