Eksperti ngre alarmin: Rrezik për sigurinë e agjentëve dhe operacioneve

Eksperti i sigurisë kibernetike Besmir Semanaj ka reaguar pas publikimit nga grupi i hakerëve “Homeland Justice” të materialeve që pretendohet se përmbajnë të dhëna të lidhura me punonjës të Shërbimit Informativ Shtetëror (SHISH).

Semanaj e ka cilësuar publikimin si një çështje që mund të ketë pasoja serioze për sigurinë kombëtare, veçanërisht nëse materialet rezultojnë autentike. Sipas tij, të dhëna të tilla mund të ekspozojnë jo vetëm individë që punojnë në strukturat e inteligjencës, por edhe burime dhe operacione të institucionit.

Eksperti thekson se në materialet e publikuara pretendohet se ndodhen dokumente që përmbajnë lista me numra telefoni, të lidhura me punonjës të SHISH. Megjithatë, ai kërkon që përpara se këto të dhëna të konsiderohen të vërteta, autenticiteti i tyre të verifikohet nga institucionet përgjegjëse.

“Nëse këto të dhëna konfirmohen si autentike, atëherë nuk kemi të bëjmë thjesht me një rrjedhje të zakonshme informacioni”, shprehet Semanaj, duke argumentuar se një situatë e tillë do të mund të prekte drejtpërdrejt sigurinë e agjentëve, burimeve dhe operacioneve të një institucioni të inteligjencës.

Në këtë kuadër, eksperti u ka bërë thirrje SHISH-it dhe Komisionerit për të Drejtën e Informimit dhe Mbrojtjen e të Dhënave Personale që të japin një qëndrim publik mbi autenticitetin e materialeve dhe masat e ndërmarra për mbrojtjen e personave që mund të jenë prekur nga publikimi.

Semanaj ka ngritur gjithashtu shqetësimin për shpërndarjen e mëtejshme të materialeve në rrjetet sociale apo në kanale të tjera.

Ai u kërkon personave që i kanë siguruar këto materiale të mos i publikojnë dhe të mos i shpërndajnë më tej, duke argumentuar se qarkullimi i tyre mund të shtojë rrezikun për personat dhe strukturat që mund të jenë të ekspozuara.

Reagimi i plotë:

Në një moment kur SHISH ndodhet tashmë në qendër të një prej krizave më të rënda institucionale të viteve të fundit, grupi i hakerëve “Homeland Justice” ka publikuar materiale ku pretendohet se ndodhen fatura të Vodafone me lista të gjata numrash telefoni, që dyshohet se lidhen me punonjës të Shërbimit Informativ Shtetëror.

Nëse këto të dhëna konfirmohen si autentike, atëherë nuk kemi të bëjmë thjesht me një rrjedhje të zakonshme informacioni. Kemi të bëjmë me një çështje që prek drejtpërdrejt sigurinë e agjentëve, të burimeve dhe të operacioneve të një institucioni të inteligjencës.

Kërkoj që SHISH-i dhe Komisioneri për të Drejtën e Informimit dhe Mbrojtjen e të Dhënave Personale të deklarojnë publikisht nëse materialet janë autentike dhe çfarë masash janë marrë për mbrojtjen e personave të prekur.

I kërkoj gjithashtu çdokujt që i ka këto materiale të mos i shpërndajë. Çdo shpërndarje e mëtejshme i shërben pikërisht qëllimit të atyre që i publikuan.

Reagimi vjen në një periudhë kur SHISH ndodhet nën vëmendje të shtuar publike dhe institucionale, ndërsa pretendimet për rrjedhje të të dhënave kërkojnë verifikim zyrtar për të përcaktuar nëse materialet janë autentike dhe çfarë informacioni përmbajnë realisht.