“Mos i drejtoni armët kundër popullit”

Persona të panjohur kanë ndërhyrë në transmetimet satelitore të televizionit shtetëror iranian, IRIB, duke shfaqur pamje dhe mesazhe në mbështetje të Princit të Kurorës në mërgim, Reza Pahlavi. Hakerët gjithashtu i bënë thirrje forcave të sigurisë të mos përdorin armët kundër popullit.

Videoja e transmetuar përfshinte dy mesazhe të Pahlavit dhe grafikë me tekstin: “Ky është një mesazh për ushtrinë dhe forcat e sigurisë. Mos i drejtoni armët kundër popullit. Bashkohuni me kombin për lirinë e Iranit!”. Princi Reza Pahlavi, më herët, kishte bërë një apel drejtuar ushtrisë, duke nënvizuar se: “Ju jeni ushtria kombëtare e Iranit, jo ushtria e Republikës Islamike. Koha juaj po mbaron, bashkohuni me popullin sa më shpejt të jetë e mundur!”.

Ky sulm kibernetik ndodh në një moment të tensionuar, pasi numri i të vrarëve në protestat antiqeveritare ka arritur afërsisht 5.000, ndërsa organizatat për të drejtat e njeriut besojnë se shifrat reale mund të jenë shumë më të larta. Autoritetet iraniane kanë vendosur një bllokadë pothuajse totale dixhitale, duke kufizuar ndjeshëm qarkullimin e informacionit nga brenda vendit.

Ky nuk është rasti i parë i ndërprerjes së transmetimeve iraniane. Në vitin 1986, CIA kishte mbështetur princin Pahlavi me një transmetues miniaturë për një transmetim 11-minutësh klandestin në Iran. Në vitin 2022, disa kanale transmetuan pamje të udhëheqësve të grupit opozitar Mujahedeen-e-Khalq, përfshirë grafikë që bënin thirrje për vdekjen e Udhëheqësit Suprem të Iranit, Ajatollah Ali Khamenei.