Hapen bastet sportive online në Shqipëri, vetëm 10 licenca

TIRANË – Këshilli i Ministrave ka miratuar përcaktimin e kritereve dhe procedurave për dhënien e licencave për bastet sportive online, duke hapur zyrtarisht këtë treg në vend, por me një kufizim të fortë në numrin e operatorëve.

Sipas vendimit, në të gjithë territorin e Shqipërisë do të jepen jo më shumë se 10 licenca për organizimin e basteve sportive online, duke krijuar një treg të kontrolluar dhe të përqendruar.

Procesi i aplikimit do të zhvillohet përmes një procedure konkurruese të organizuar nga Autoriteti i Mbikëqyrjes së Lojërave të Fatit dhe Komisioni i Licencave. Thirrja për aplikime do të publikohet në faqen zyrtare të AMLF-së, në dy gazeta ndërkombëtare dhe në Buletinin e Njoftimeve Publike.

Aplikimet duhet të dorëzohen nga persona juridikë të regjistruar si shoqëri aksionare, brenda një afati prej 45 ditësh nga shpallja e procedurës.

Vlerësimi i aplikimeve do të bazohet në pesë kritere kryesore, me një total maksimal prej 100 pikësh:

• Oferta ekonomike – 30 pikë
• Përvoja në fushën e lojërave të fatit – 30 pikë
• Plani i biznesit për aktivitetin online – 5 pikë
• Kapacitetet organizative dhe administrative – 20 pikë
• Zgjidhjet software-ike dhe certifikimet ndërkombëtare – 15 pikë

Ky vendim shënon një hap të ri në rregullimin e industrisë së basteve në Shqipëri, duke vendosur standarde të qarta për operatorët që synojnë të hyjnë në tregun online.