I mbyllin faqen e “Facebook-ut”: Po punojmë me Meta-n për rikthimin e faqes

Deputetja e Partisë Socialiste, Elisa Spiropali, ka bërë të ditur se faqja e saj zyrtare në Facebook është bllokuar prej tre ditësh.

Përmes një postimi në Instagram, Spiropali njoftoi se po bashkëpunon me kompaninë Meta për të rikthyer llogarinë, ndërsa u kërkoi ndjekësve që komunikimin me të ta vijojnë përmes këtij rrjeti social, deri në një njoftim të ri.

“Të dashur miq, prej tre ditësh, faqja ime zyrtare në Facebook është e bllokuar. Po punojmë ngushtë me Meta-n që ta rikthejmë sa më shpejt. Për të gjithë ju që keni tentuar të më shkruani, deri në njoftimin e radhës, mund të më kontaktoni drejtpërdrejt këtu në Instagram. Faleminderit për mirëkuptimin dhe mbështetjen tuaj!”, shkruan Spiropali.

Bllokimi i faqes vjen në një moment kur deputetja socialiste ka mbajtur qëndrime kritike për zhvillimet politike në vend. Së fundmi, ajo i është drejtuar kryeministrit Edi Rama me thirrjen që të “hapë krahun”, duke e lidhur këtë kërkesë me nevojën për një zgjidhje të krizës politike pas protestave studentore.

Megjithatë, deri më tani nuk është bërë e ditur arsyeja e bllokimit të faqes dhe nuk ka të dhëna që të provojnë një lidhje mes këtij veprimi dhe qëndrimeve politike të Spiropalit.