Shefi i Amazon “trazon ujërat” në Premier League

Jeff Bezos ka hedhur sytë nga futbolli anglez dhe është pranë një investimi të rëndësishëm te gjigandët e Liverpool. Sipas mediave britanike, miliarderi amerikan është pjesë e një konsorciumi që po negocion me Fenway Sports Group (FSG) për blerjen e një pakete të konsiderueshme aksionesh në klub.

Raportimet tregojnë se bisedimet kanë avancuar ndjeshëm dhe një marrëveshje mund të zyrtarizohet brenda kësaj jave. Konsorciumi udhëhiqet nga Amit Bhatia, ish-bashkëpronar i Queens Park Rangers, ndërsa pjesë e investitorëve është edhe Eduardo Saverin.

Negociatat me FSG kanë vijuar prej rreth tre muajsh dhe marrëveshja në diskutim parashikon shitjen e rreth një të tretës së aksioneve të Liverpool. Ky operacion financiar e vlerëson klubin në afro 4.5 miliardë paund, duke e renditur ndër më të vlefshmit në futbollin europian.

Përfshirja e Bezos do t’i japë konsorciumit një peshë të jashtëzakonshme financiare, duke qenë se ai është një nga njerëzit më të pasur në botë përmes kompanisë së tij, Amazon. Po ashtu, Saverin sjell eksperiencë dhe kapital nga sektori i teknologjisë, si bashkëthemelues i Facebook së bashku me Mark Zuckerberg.

Nëse marrëveshja finalizohet, Liverpool do të ketë në strukturën e tij disa nga emrat më të fuqishëm të botës së biznesit dhe teknologjisë. Megjithatë, ekspertët theksojnë se investimi nuk do të thotë automatikisht rritje e menjëhershme e shpenzimeve në merkato, për shkak të rregullave financiare të Premier League.

FSG mori kontrollin e Liverpool në vitin 2010 për rreth 300 milionë paund dhe gjatë kësaj periudhe klubi është rikthyer në majat e futbollit, duke fituar trofe madhorë si Premier League dhe UEFA Champions League.

Një marrëveshje e mundshme me konsorciumin e drejtuar nga Bhatia do të ishte ndër transaksionet më të rëndësishme financiare në futbollin anglez në vitet e fundit, duke hapur një kapitull të ri në strukturën e pronësisë së klubit.