Kapitulli 21 i negociatave me BE-në, shtyhet vendimmarrja për Shqipërinë

Ambasadorët e 27 shteteve anëtare të Bashkimit Europian, të mbledhur në Bruksel, kanë miratuar me konsensus qëndrimin e përbashkët për Kapitullin 21 – Rrjetet Trans-Europiane të Transportit për Malin e Zi.

Mbyllja zyrtare e këtij kapitulli pritet të konfirmohet gjatë Konferencës Ndërqeveritare mes Malit të Zi dhe Bashkimit Europian, e cila është planifikuar të zhvillohet më 17 mars në Bruksel.

Procesi i negociatave për anëtarësim i Malit të Zi në BE vijon të ecë përpara. Deri më tani, Podgorica ka hapur të gjithë 33 kapitujt e negociatave dhe ka arritur të mbyllë 13 prej tyre, duke mbetur një nga vendet më të avancuara në procesin e zgjerimit në rajonin e Ballkanit Perëndimor.

Ndërkohë, situata për Shqipërinë mbetet më e ndërlikuar. Për shkak të mungesës së konsensusit mes shteteve anëtare të BE-së, është shtyrë vendimmarrja për raportin e ndërmjetëm IBAR, që lidhet me standardet në sistemin gjyqësor.

Ky raport konsiderohet një element kyç, pasi pa miratimin e tij nuk mund të nisë procesi i mbylljes së kapitujve të negociatave për Shqipërinë.

Lidhur me këto zhvillime në procesin e zgjerimit të Bashkimit Europian, komisionerja për Zgjerimin Marta Kos pritet të raportojë të hënën pasdite në Komisionin e Punëve të Jashtme të Parlamentit Europian, pas mbledhjes së ministrave të jashtëm të vendeve të BE-së.

Ndërkohë, të mërkurën pas takimit të ministrave për Çështjet Europiane, eurodeputetëve në seancën e pasdites do t’u drejtohet edhe shefja e diplomacisë europiane Kaja Kallas, e cila pritet të japë detaje mbi ecurinë e procesit të zgjerimit dhe zhvillimet e fundit në rajon.