Kontrabanda e diamanteve në Portin e Durrësit, ndalohet 30-vjeçari

Katër diamante janë sekuestruar nga autoritetet në Portin e Durrësit gjatë kontrolleve të zhvilluara në automjetet që mbërritën me traget nga Ankona e Italisë.

Gjatë operacionit, policia ndaloi një 30-vjeçar, të identifikuar si Dhionis Dervishaj, i cili kishte me vete katër gurë të çmuar me vlerë të përllogaritur rreth 4 400 euro. Sipas autoriteteve, origjina dhe dokumentacioni i diamantëve po verifikohen, pasi burimi i tyre nuk është ende i qartë.

Kontrollet në port vijuan edhe në automjete të tjera të ardhura nga Italia. Në një prej tyre u zbulua e fshehur mes bagazheve një pajisje elektronike e specializuar për detektimin e metaleve të çmuara, e cila u sekuestrua për verifikime të mëtejshme.

Ndërkohë, një tjetër kontroll i ushtruar nga shërbimet ligjzbatuese çoi në zbulimin e një sasie lënde narkotike, duke zgjeruar më tej operacionin dhe hetimet për rastet e konstatuara në Portin e Durrësit.