Lea Ypi në krah të protestuesve, ndan pamje nga tubimi

Akademikja dhe shkrimtarja shqiptare Lea Ypi ka reaguar sërish në lidhje me protestën qytetare që po zhvillohet në Tiranë, duke shprehur publikisht mbështetjen e saj për tubimin masiv që prej ditësh po mbledh mijëra njerëz në kryeqytet.

Përmes një postimi në rrjetet sociale, Ypi publikoi një fotografi nga protesta e zhvilluar përballë Kryeministrisë, ku shihen qytetarë të shumtë të mbledhur në shenjë kundërshtimi ndaj qeverisë. Krahas imazhit, akademikja ka zgjedhur të përcjellë një mesazh të shkurtër, por me ngarkesë të qartë simbolike: “Shumë krenare”.

Publikimi u shoqërua edhe me këngën patriotike “Dua më shumë Shqipërinë”, një detaj që tërhoqi vëmendjen e ndjekësve të saj dhe nxiti reagime të shumta në rrjetet sociale.

Ky nuk është reagimi i parë i autores në mbështetje të protestës. Deklarata e saj vjen në një moment kur demonstratat kundër qeverisë së kryeministrit Edi Rama vijojnë prej më shumë se një jave në Tiranë, me pjesëmarrje të lartë qytetare dhe aktivitete të përditshme në zona të ndryshme të kryeqytetit.