Lea Ypi publikon letrën: Diaspora në Britani, në krah të protestuesve

Shkrimtarja dhe akademikja shqiptare Lea Ypi ka bërë publike një letër të hapur të firmosur nga njëmbëdhjetë organizata dhe shoqata shqiptare me bazë në Mbretërinë e Bashkuar, përmes së cilës shprehet mbështetje për protestat qytetare në Shqipëri dhe dënohet përdorimi i dhunës ndaj protestuesve paqësorë.

Letra, e shpërndarë nga Ypi në rrjetet sociale, i drejtohet Qeverisë dhe Kuvendit të Shqipërisë dhe vë në dukje se protestat përfaqësojnë një shoqëri civile gjithnjë e më të organizuar dhe të ndërgjegjshme për të drejtat e saj.

Në përmbajtjen e saj theksohet se këto protesta janë një shprehje e demokracisë dhe e së drejtës kushtetuese për të kërkuar llogari ndaj institucioneve. Sipas organizatave firmëtare, në tubime marrin pjesë qytetarë nga shtresa të ndryshme, përfshirë të rinj, prindër, profesionistë dhe studiues, të cilët kërkojnë mbrojtjen e pasurive natyrore, hapësirave publike dhe rritjen e transparencës institucionale.

Dokumenti dënon çdo formë dhune, frikësimi apo presioni ndaj protestuesve dhe u bën thirrje institucioneve shtetërore që të adresojnë kërkesat e qytetarëve.

Në letër renditen katër kërkesa kryesore: transparencë e plotë për vendimet dhe kontratat që lidhen me mjedisin, llogaridhënie për koncesionet dhe privatizimet, mbrojtje e interesit publik në politikat e zhvillimit ekonomik, si dhe hapje e një dialogu të strukturuar me shoqërinë civile.

Letra është firmosur nga një sërë organizatash shqiptare në Britani, përfshirë shoqata studentore në universitete si Cambridge, LSE dhe UCL, si dhe grupe kulturore e komunitare të diasporës.