Rama, Berisha, oligarkët dhe krimi kanë marrë peng Shqipërinë

Pedagogu dhe analisti Roland Bejko foli sot për zhvillimet e fundit brenda Partisë Demokratike, duke vënë në qendër të vëmendjes lëvizjen e re të udhëhequr nga Ervin Salianji dhe Ilir Alimehmeti.

Sipas tij, kjo është shpresa e fundit për të shpëtuar PD-në, përballë ndikimit të Berishës, i cili sipas Bejkos, po përpiqet me çdo mënyrë të shkatërrojë këtë frymë të re që nuk ka pasur asnjë mundësi të konsolidohet ende.

“Berisha po vepron si gjithmonë si përçarës i së djathtës. Ai nxori nga historia studentët e Dhjetorit dhe tani përpiqet të bllokojë çdo iniciativë të re,” tha Bejko, duke vënë në dukje se kreu i PD-së po përdor taktika të njohura historikisht edhe më parë, për të mbajtur partinë nën kontroll.

Analisti kritikoi gjithashtu koalicionin e rrezikshëm ndërmjet Ramës, Berishës, oligarkëve dhe krimit të organizuar, duke e përshkruar Shqipërinë si peng të një blloku pushteti ku politika dhe interesi kriminal ndërthuren për të mbajtur vendin nën kontroll.

“Rama dhe Berisha, bashkë me oligarkët dhe krimin e organizuar, kanë marrë peng Shqipërinë,” tha ai, duke i vendosur dy figurat historikisht kundërshtare në të njëjtën anë të barikadës së interesave.

Megjithatë, Bejko sheh dritën e shpresës te lëvizja e re brenda PD-së, e cila mund të sjellë gjeneratë të re politikanësh, larg ndikimit të Berishës dhe praktikave të vjetra të tranzicionit.

Sidoqoftë, rruga nuk është e lehtë: tradhtarët dhe “armiqtë e brendshëm” mbeten një kërcënim i vazhdueshëm për çdo proces reformimi.

Bejko përfundoi me një paralajmërim të fortë: Berisha është i zbuluar dhe strategjia e tij nuk funksionon më në një realitet të ndryshuar, ndërsa Salianji dhe Alimehmeti përfaqësojnë mundësinë e fundit për të rifilluar një PD të hapur dhe të fuqishme.