Pas shkrirjes së 15 Bashkive, PS bën gati “krasitjen” e deputetëve

Pas miratimit të Reformës Territoriale, që parashikon shkrirjen e 15 bashkive, Partia Socialiste po shtyn përpara një tjetër propozim për ndryshime në organizimin institucional të vendit. Këtë herë, në fokus është përbërja e Kuvendit të Shqipërisë, me socialistët që propozojnë reduktimin e numrit të deputetëve nga 140 në 101.

Nismën e bëri të ditur kryetari i Grupit Parlamentar të Partisë Socialiste, Taulant Balla, i cili ftoi Partinë Demokratike të ulet në diskutime për realizimin e ndryshimeve kushtetuese. Sipas tij, propozimi për uljen e numrit të deputetëve është paraqitur nga PS-ja që në fillim të këtij viti.

Balla deklaroi se mazhoranca është e gatshme të diskutojë edhe ndryshimet kushtetuese që lidhen me organizimin e vendit në rajone, nëse opozita dëshiron ta përfshijë këtë çështje në bisedime.

“Ne kemi ardhur në fillim të këtij viti me propozimin e ndryshimeve kushtetuese, për të shkuar nga 140 anëtarë të Kuvendit në 101. Nëse PD-ja është e gatshme, e ftoj që të përcaktojmë ndryshimet kushtetuese. Nëse PD-ja do që të bëjë ndryshime kushtetuese për rajonet, jemi të hapur për diskutime”, u shpreh Balla.

Propozimi për reduktimin e numrit të deputetëve hap një tjetër debat politik për mënyrën se si duhet të organizohen institucionet përfaqësuese në Shqipëri. Për ta konkretizuar nismën, do të nevojiten diskutime mes forcave politike dhe miratimi i ndryshimeve përkatëse kushtetuese.

Deklarata e Ballës vjen pas debatit të fortë për Reformën Territoriale, e cila u miratua në Kuvend me 85 vota dhe parashikon ndryshime në ndarjen administrative të vendit. Mbetet për t’u parë nëse ftesa e socialistëve do të sjellë një tryezë të përbashkët me opozitën dhe nëse propozimi për një Kuvend me 101 deputetë do të marrë mbështetjen e nevojshme politike.