Lëvizje në krye të IKMT dhe Prefekturës së Tiranës

Pas largimit të Dallëndyshe Bici nga posti i Kryeinspektores së Inspektoratit Kombëtar të Mbrojtjes së Territorit, një tjetër riorganizim pritet të prekë institucionet qendrore.

Bici mbajti këtë detyrë për 18 muaj. Në vend të saj u komandua Adriatik Kupi, një emër i njohur në administratën publike. Ai ka qenë më parë administrator i Njësisë Administrative Petrelë në Tiranë dhe më pas drejtor i Operatorit të Sistemit të Shpërndarjes.

Megjithatë, burime për Publik.al bëjnë me dije se në krye të IKMT-së pritet të emërohet Afrim Qendro.

Në të njëjtën kohë, një tjetër lëvizje pritet në Prefekturën e Tiranës. Afrim Qendro do të lërë detyrën e Prefektit të Qarkut Tiranë, ndërsa në vend të tij pritet të emërohet Shkëlqim Hajdari.

Kujtojmë se Afrim Qendro është aktualisht nën hetim nga SPAK.

Burime pranë institucioneve qendrore bëjnë me dije se këto ndryshime mund të formalizohen shumë shpejt, si pjesë e një riorganizimi më të gjerë në administratën shtetërore.

Shkëlqim Hajdari ka mbajtur më herët funksione të rëndësishme publike, përfshirë detyrën e Kryeinspektorit të Përgjithshëm, si dhe ka një eksperiencë të gjatë në sistemin e drejtësisë.