Lufta në Lindjen e Mesme do të çojë në rritje të çmimeve të ushqimeve

Përshkallëzimi i konfliktit në Lindjen e Mesme po prodhon pasoja të thella, duke tronditur jo vetëm jetën e përditshme të njerëzve në rajon, por edhe ekuilibrat ekonomikë globalë.

Ky shqetësim u theksua pas një takimi të zhvilluar më 8 prill nga drejtuesit e Fondit Monetar Ndërkombëtar, Grupit të Bankës Botërore dhe Programit Botëror të Ushqimit, ku në fokus ishte ndikimi zinxhir i luftës në ekonominë botërore dhe sigurinë ushqimore.

Sipas vlerësimeve të tyre, tensionet në rajon kanë shkaktuar një ndër goditjet më të forta në tregjet ndërkombëtare të energjisë në dekadat e fundit. Rritja e ndjeshme e çmimeve të naftës, gazit dhe inputeve bujqësore, e shoqëruar me vështirësi në zinxhirët e furnizimit dhe transportit, po ushqen një valë të re inflacioni që pritet të reflektohet drejtpërdrejt në çmimet e ushqimeve.

Pasojat më të rënda pritet t’i ndjejnë vendet me të ardhura të ulëta dhe ekonomitë që varen nga importet. Në këto shtete, hapësira për ndërhyrje fiskale është e kufizuar, ndërsa niveli i borxhit publik mbetet i lartë, duke e bërë më të vështirë mbrojtjen e shtresave më të ekspozuara ndaj krizës.

Rritja e kostove të energjisë dhe ushqimeve po shton presionin mbi familjet vulnerabël, duke rrezikuar përkeqësimin e mëtejshëm të kushteve të jetesës dhe zgjerimin e pasigurisë ushqimore në shkallë globale.

Institucionet ndërkombëtare theksuan se do të intensifikojnë bashkëpunimin për të mbështetur stabilitetin financiar dhe për të zbutur efektet e krizës, me fokus të veçantë tek vendet më të goditura.