Marshim e gaz lotsjellës, sheshi ‘Skënderbej’ kthehet në shesh ‘beteje’

Protesta e tetë e gjimnazistëve dhe studentëve kundër qeverisë vijon mes tensioneve në Tiranë. Gjatë marshimit në Sheshin Skënderbej, policia ka përdorur gaz lotsjellës, ndërsa efektivët kanë krijuar një kordon për të penguar lëvizjen e protestuesve drejt bulevardit “Dëshmorët e Kombit”.

Pas ndërhyrjes së policisë, studentët dhe nxënësit janë grumbulluar në sheshin qendror të kryeqytetit, ku po diskutojnë se si do të vijojnë protestën.

Forcat e rendit bllokojnë marshimin drejt bulevardit

Situata është tensionuar teksa të rinjtë synonin të vazhdonin marshimin. Forcat e rendit kanë vendosur një barrierë për të mos lejuar kalimin e tyre drejt bulevardit ku ndodhen institucionet kryesore shtetërore.

Protesta e tetë, një përshkallëzim i ri në qendër të Tiranës

Protesta e tetë vjen në vijim të disa ditëve të mobilizimit të studentëve, gjimnazistëve dhe qytetarëve kundër qeverisë. Përdorimi i gazit lotsjellës dhe bllokimi i marshimit kanë sjellë një tjetër përshkallëzim të situatës në qendër të Tiranës. Protestuesit pritet, megjithatë, të vendosin për hapat e mëtejshëm.