Në Onkologjik mungojnë ilaçet, Rama blen dronë 20 mijë euro për gaz lotsjellës

Deputeti i Lëvizjes Bashkë, Redi Muçi, ka reaguar ashpër pas raportimeve për përdorimin e një droni gjatë protestës studentore para Kryeministrisë, nga i cili dyshohet se është hedhur gaz lotsjellës në drejtim të protestuesve.

Përmes një postimi në Instagram, Muçi ka ngritur pikëpyetje mbi prioritetet e shpenzimeve shtetërore, duke vënë në kontrast mungesën e medikamenteve në Spitalin Onkologjik me shumën prej 20 mijë eurosh që, sipas tij, është paguar për blerjen e dronit të përdorur gjatë protestës.

Deputeti e ka cilësuar paradoksale faktin që, ndërsa pacientët përballen me mungesën e barnave, shteti shpenzon shuma të konsiderueshme për pajisje që, sipas denoncimit të tij, përdoren kundër studentëve që kanë dalë në rrugë për të kërkuar të drejtat e tyre.

“Në Onkologjik nuk ka ilaçe, por shteti ka para për dronë 20.000 euro që hedhin gaz lotsjellës”, shkruan Muçi në reagimin e tij.

Krahas mesazhit, deputeti ka publikuar edhe pamjet filmike të incidentit, duke rikthyer në vëmendje përdorimin e mjeteve të pazakonta gjatë ndërhyrjeve ndaj protestuesve studentorë.