Me mbështetjen e pedagogëve, ‘zbythen’ karriget e dialogut të Ramës

Pedagogë, akademikë dhe protestues janë bashkuar në një marshim nga Universiteti Politeknik, në shenjë solidariteti me studentët dhe protestën e tyre kundër qeverisë.

Marshimi ka vijuar drejt Kryeministrisë, ku protestuesit kanë ndaluar për të shprehur kundërshtimin ndaj qëndrimit të qeverisë. Gjatë kësaj ndalese, karriget e vendosura para godinës si pjesë e ftesës për dialog janë hedhur nga protestuesit në shkallët e Kryeministrisë, në një gjest që shënoi refuzimin e tyre ndaj kësaj nisme.

Protesta është shoqëruar me thirrje të forta kundër qeverisë dhe Policisë së Shtetit. Pjesëmarrësit kanë kërkuar lirimin e studentëve të shoqëruar dhe dorëheqjen e kryeministrit.

“Pa dorëheqje nuk ndalojmë”, “Lironi studentët”, “Policia e krimit” dhe “Qeveria e krimit” janë disa nga sloganet që kanë jehuar gjatë marshimit.

Pedagogët i bashkohen lëvizjes studentore

Përfshirja e pedagogëve dhe akademikëve në protestë i jep një dimension të ri lëvizjes studentore. Ajo vijon të shprehë pakënaqësinë ndaj qeverisë dhe mënyrës së reagimit të institucioneve ndaj protestuesve.