Mikrokreditë si minierë ari, Kredo raporton 6.3 milionë euro fitim

Pavarësisht skandaleve që kanë tronditur tregun e mikrokredive në Shqipëri gjatë viteve të fundit, kompanitë e këtij sektori vijojnë të raportojnë fitime të konsiderueshme.

Sipas të dhënave financiare, kompania ECFA, e njohur në treg me markën Kredo, e mbylli vitin e kaluar me një fitim neto pas taksave prej 593.2 milionë lekësh, ose rreth 6.3 milionë euro. Shoqëria renditet ndër operatorët më të mëdhenj të mikrokredisë në vend, në një treg që ka qenë vazhdimisht në qendër të debateve për normat e larta të interesit dhe kostot e financimit për qytetarët.

Rezultatet financiare vijnë në një kohë kur tregu ende përballet me pasojat e skandalit të MCA-së, i cili nxori në pah problematika serioze në administrimin e kredive dhe mbrojtjen e huamarrësve. Megjithatë, aktiviteti i institucioneve të mikrokredisë ka vijuar, ndërsa fitimet e sektorit mbeten të larta.

Modeli i financimit të këtyre kompanive mbështetet në sigurimin e fondeve përmes huave bankare, financimeve nga aksionerët ose emetimit të obligacioneve. Sipas të dhënave financiare, ECFA financon aktivitetin e saj me kosto interesi rreth 13.5% në vit, ndërsa kreditë për klientët jepen me norma dukshëm më të larta.

Pas denoncimeve të shumta për praktikat e ndjekura nga disa institucione të mikrokredisë, Banka e Shqipërisë ndërhyri duke vendosur një kufi maksimal për interesin efektiv të kredive konsumatore, i cili aktualisht është 51.3%.

Megjithatë, kjo normë vijon të konsiderohet e lartë nga ekspertë dhe mbrojtës të konsumatorëve, të cilët argumentojnë se, edhe pas ndërhyrjeve rregullatore, kreditë me interesa të larta mbeten një barrë e rëndë për shumë familje shqiptare.

Debati mbi funksionimin e tregut të mikrokredive mbetet i hapur, ndërsa fitimet e larta të kompanive të sektorit rikthejnë në vëmendje diskutimet mbi balancën mes aktivitetit financiar dhe mbrojtjes së konsumatorit.