Miliona për deputetët dhe zero për paraplegjikët!

Teksa po flitej rreth ratifikimit që i ka bërë Shqipëria, konventës për respektimin e të drejtave të personave paraplegjikë dhe atyre me aftësi të veçanta, ka ndërhyrë me një fjalim të dhimbshëm Presidenti i Paraplegjikëve, Ndrek Ismailaj.

Publikisht Ismailaj ka treguar vështirësitë e çdo personi me aftësi të kufizuar fizike dhe braktisjen totale që u ka bërë shteti, i njëjti shtet që dërgon miliona për shërimin e deputetëve.

A e imagjinoni se ç’do të thotë me pasë një fëmijë me Sindromën Down, a e kuptoni? Duhet mbi 1 milion lekë të vjetra me e mbajt atë fëmijë. Të flasësh të thonë po ky ça është i majtë apo i djathtë? Unë jam me karrige me rrota. Ku i keni kurrikulat, apo marrin shërbim personat? Jo, bëni kurrikula sa të doni ju. 8 mijë lekë marrim në muaj. Çfarë mund të bëjmë me 8 mijë lekë? Një nga ne shkon një ditë më ngrënë një drekë, po 29 ditë të tjera? A kanë drejtë edhe ata me jetu? A kanë të drejtë ata me dalë njëherë më familjen e vetë? A kanë të drejtë me i shkollu fëmijët, me i çu jashtë? A kanë të drejtë me u shëru jashtë? Miliona lekë shkojnë për deputetë, po mua që jam i sëmurë me gurë në veshka?”,  janë këto disa nga fjalët që tha mbrëmë Ndrek Ismailaj, i cili i vuri të gjithë në heshtje.