Monika Kryemadhi: Askush s’ka punë me dhomën e gjumit të tjetrit

Deputetja Monika Kryemadhi ka reaguar lidhur me videot intime të disa personazheve të njohur të ekranit, të cilat prej ditësh po qarkullojnë në rrjetet sociale dhe kanë shkaktuar debat të gjerë publik.

E pyetur nga gazetarët nëse i ka parë materialet, Kryemadhi konfirmoi se i ka parë dhe tha se përmbajtja i ka shkaktuar një ndjesi të rëndë, veçanërisht për shkak të personave që janë përfshirë në këto materiale.

Kryemadhi u shpreh se përgjegjësia duhet të kërkohet tek personat që kanë realizuar regjistrimet, por edhe tek ata që më pas i kanë shpërndarë ato. Sipas saj, publikimi i materialeve intime përbën një veprim që duhet të ndëshkohet, ndërsa jeta private e individëve nuk duhet të kthehet në objekt gjykimi publik.

“Po, i kam parë. Përveç ndjesisë së shëmtuar që më la për shkak të viktimave, të gjitha atyre grave apo vajzave, kushdo që janë. Personi që i ka bërë, ai që i ka regjistruar, por edhe ai që i ka shpërndarë, ka bërë një veprim shumë të ulët dhe që duhet të dënohet”, deklaroi ajo.

Duke folur për reagimin shoqëror ndaj rasteve të tilla, Kryemadhi theksoi se njerëzit nuk duhet të merren me atë që një person zgjedh të bëjë në jetën e tij private, përfshirë edhe marrëdhëniet intime.

“Aq më pak duhet t’i interesojë dikujt se çfarë bën një njeri në dhomën e vet të gjumit apo me jetën e tij private”, tha Kryemadhi.

Më tej, ajo e zhvendosi vëmendjen tek mënyra se si shoqëria po reagon ndaj problematikave të ndryshme, duke e lidhur debatin për videot intime me çështje sociale dhe ekonomike që prekin vendin.

Sipas Kryemadhit, është shqetësuese që një material intim të marrë më shumë vëmendje dhe të shkaktojë më shumë reagim sesa probleme si taksat, largimi i të rinjve dhe të rejave apo shpopullimi i Shqipërisë.

“Të ndihesh më i dhunuar nga një video porno që shikon sesa nga taksat e larta, nga largimi i të rejave dhe të rinjve, shpopullimi i Shqipërisë, është fatkeqësi e madhe dhe për mua fatkeqësi kombëtare”, u shpreh ajo.

Në përfundim, Kryemadhi tha se ndjen keqardhje dhe neveri ndaj personave që kanë realizuar dhe shpërndarë materiale të tilla, duke vënë theksin tek mbrojtja e viktimave dhe respektimi i privatësisë.

“Për mua është fatkeqësi kombëtare. Më vjen shumë keq dhe ndjej neveri për vepruesit që e kanë bërë atë gjë”, përfundoi Kryemadhi.