‘Neomalësorja’ paralajmëron Bajrat: Do ju shkatërroj!

Një reagim i ashpër nga deputetja Marjana Koçeku ka ndezur debat në rrjet, pasi ajo publikoi një mesazh të drejtpërdrejtë dhe me tone kërcënuese lidhur me situatën e fundit.

Në një postim në rrjetet sociale, Koçeku i drejtohet “Bajrave të Shkodrës”, duke paralajmëruar pasoja të rënda në rast se familja e saj preket. “Nëse familjes time i preket qoftë edhe një qime floku, unë s’kam me lanë pa ju shkatërrue, sa ta kem jetën”, shkruan ajo, në një deklaratë që ka tërhequr menjëherë vëmendjen publike.

Reagimi i deputetes vjen në një moment të ndjeshëm politik dhe social, ndërsa protesta qytetare në Tiranë po hyn në ditët e saj më intensive dhe po zgjerohet me kërkesa gjithnjë e më të forta ndaj klasës politike.

Paralelisht me këtë zhvillim, aktivistë dhe protestues kanë nisur t’i bëjnë thirrje publike Koçekut që t’u bashkohet në shesh, pas deklarimit të saj për distancim nga Partia Socialiste. Një nga zërat më të njohur të protestës, Klajdi Bello, kujton bashkëpunimin me deputeten gjatë protestave studentore të vitit 2018 dhe shpreh pritshmëri që ajo të rikthehet në krah të qytetarëve.

Sipas tij, ftesa është bërë në emër të një angazhimi të mëparshëm për një Shqipëri ku zëri i qytetarëve ka peshë reale në vendimmarrje.

Ndërkohë, brenda protestës nuk kanë munguar edhe paqartësitë dhe debatet për mënyrën e organizimit. Lëvizja drejt Rinasit, e njoftuar përmes rrjeteve sociale, ka shkaktuar reagime të ndryshme mes pjesëmarrësve, të cilët theksojnë se qëllimi i tyre nuk është bllokimi i qytetarëve, por mbështetja e tyre.

Për të shmangur situata të ngjashme dhe për të ruajtur qartësinë e aksionit, organizatorët kanë vendosur rregulla të reja, duke kufizuar marshimet brenda unazës së Tiranës.

Në këtë klimë tensioni dhe pasigurie, mesazhi i Koçekut shihet si një sinjal i fortë i përshkallëzimit të retorikës, ndërsa mbetet për t’u parë se si do të ndikojë kjo në zhvillimet e mëtejshme politike dhe në raportin e saj me protestën qytetare.