Ngrihet alarmi: Armatimi pa leje sot në Shqipëri, si në ’97-ën

Një debat banal për një filxhan kafeje përfundoi me gjakderdhje në orët e para të mëngjesit në Manzë, ku dy të rinj humbën jetën tragjikisht.

Ngjarja ndodhi rreth orës 01:30, kur Aranit Kurti, 23 vjeç, dhe Daniel Pepa, 21 vjeç, u ulën në një lokal dhe kërkuan kafe. Kamerieri, Alteo Pepa, që ndodhej në tavolinë bashkë me Flori Paluçin, 33 vjeç, u tha se ekspresi ishte i fikur dhe nuk mund t’u shërbente. Kaq mjaftoi që biseda të kthehej në debat, e më pas në përplasje fizike dhe përdorim armësh.

Sipas të dhënave paraprake, sherri eskaloi brenda pak sekondash, duke u shndërruar në një përleshje të armatosur që u mori jetën të rinjve.

Eksperti i kriminalistikës Ervin Karamuço ka ngritur alarmin për nivelin e armatosjes në ambientet e tilla, duke kërkuar kontrolle urgjente nga policia.

“Në 1:30 të natës, njëri ngrihet dhe godet kamerierin sepse s’i bëri kafen, pastaj tjetri qëllon mbi të. Sot, një në tre makina del me armë. Këto lokale duhen kontrolluar, sepse kemi arritur në një nivel armatosjeje që na kujton vitin ’97,” – u shpreh Karamuço.