Operacion i përbashkët Doganë-Polici, kapen kokainë dhe gurë diamanti

Një operacion i përbashkët mes Doganës së Durrësit dhe strukturave të Policisë së Shtetit ka çuar në zbulimin dhe sekuestrimin e një sasie të dyshuar kokaine, katër gurëve të dyshuar si diamante, si dhe një aparature elektronike për detektimin e metaleve të çmuara.

Aksioni u zhvillua gjatë kontrolleve të shtuara në Portin e Durrësit, ku prej muajsh Dogana dhe Policia e Shtetit kanë intensifikuar bashkëpunimin për goditjen e aktiviteteve të paligjshme në pikat kufitare. Vetëm gjatë dy muajve të fundit, operacionet e përbashkëta kanë sjellë disa goditje të rëndësishme ndaj trafikimit të lëndëve narkotike, kontrabandës dhe veprimtarive të tjera kriminale.

Sipas informacionit zyrtar, zbulimet e fundit u realizuan gjatë kontrolleve të ushtruara ndaj automjeteve dhe udhëtarëve që mbërritën në Portin e Durrësit nga Italia.

Në njërin prej rasteve, gjatë kontrollit të një automjeti që kishte mbërritur me tragetin e linjës Ankona–Durrës, autoritetet konstatuan një valixhe ku ndodhej një aparaturë elektronike për detektimin e metaleve të çmuara, së bashku me aksesorët përkatës të montimit.

Në një tjetër kontroll fizik ndaj një shtetasi që udhëtonte me automjet të ardhur nga Italia, u gjetën katër paketime transparente që përmbanin gurë të ngjashëm me diamantet. Gurët janë sekuestruar dhe pritet t’i nënshtrohen ekspertizave për të përcaktuar origjinën dhe vlerën e tyre.

Ndërkohë, në një automjet tjetër, shërbimet e kontrollit zbuluan një sasi të dyshuar lënde narkotike të llojit kokainë. Sipas të dhënave paraprake, droga ishte fshehur në një veshje të vendosur në kabinën e drejtuesit të mjetit.

Të gjitha materialet e sekuestruara janë marrë në cilësinë e provës materiale, ndërsa hetimet vijojnë për identifikimin e personave të përfshirë dhe dokumentimin e plotë të veprimtarive të dyshuara kriminale.

Operacioni i fundit konsiderohet një tjetër rezultat i bashkëpunimit të ngushtë mes Doganës së Durrësit dhe Policisë së Shtetit, të cilat gjatë muajve të fundit kanë shtuar kontrollet dhe shkëmbimin e informacionit për parandalimin dhe goditjen e trafiqeve të paligjshme në hyrje të vendit.