Qeveria: S’ka vend për alarm!

Debati mbi sigurinë kombëtare është rikthyer në qendër të vëmendjes në Kuvend, pas paralajmërimit të Ambasadës së Shteteve të Bashkuara në Shqipëri për kërcënime të mundshme nga grupe të lidhura me Iranin.

Nga foltorja e Parlamentit, deputeti i Partisë Demokratike, Tritan Shehu, kërkoi reagim institucional të menjëhershëm, duke i bërë thirrje Presidentit të Republikës që të mbledhë Këshillin e Sigurisë Kombëtare. Ai theksoi se situata nuk duhet trajtuar me lehtësi dhe kërkoi që çështja të diskutohet në mënyrë të plotë dhe transparente në Kuvend.

Sipas Shehut, paralajmërimi i ambasadës amerikane është serioz dhe kërkon një analizë të thelluar nga institucionet shqiptare. Ai kritikoi mungesën e një reagimi të menjëhershëm nga qeveria dhe presidenca, duke theksuar se deputetët duhet të informohen mbi masat konkrete që janë ndërmarrë për garantimin e sigurisë në vend.

Në përgjigje, ministri për Evropën dhe Punët e Jashtme, Ferit Hoxha, siguroi se situata në Shqipëri është nën kontroll dhe nuk ka vend për panik. Ai bëri të ditur se institucionet shqiptare janë në kontakt të vazhdueshëm me partnerët ndërkombëtarë, përfshirë edhe NATO, si në Tiranë ashtu edhe në Uashington.

Hoxha nënvizoi se çdo informacion i ri do të komunikohet përmes kanaleve zyrtare, ndërsa institucionet përgjegjëse po e ndjekin situatën me vëmendje të shtuar dhe në koordinim të plotë me strukturat më të larta shtetërore.

Debati në Kuvend reflektoi ndarjen mes opozitës, e cila kërkon më shumë transparencë dhe reagim institucional, dhe qeverisë, që këmbëngul se nuk ka arsye për alarm, duke garantuar se siguria në vend mbetet e qëndrueshme.