Opozita zbulon orën e protestës, ja rrugët që do bllokohen

Protesta e opozitës, e paralajmëruar të zhvillohet këtë të premte përpara Kryeministrisë në Tiranë, do të nisë në orën 19:00.

Në kuadër të garantimit të rendit dhe sigurisë, Policia e Shtetit ka bërë publike planin e masave, i cili parashikon kufizime të përkohshme në qarkullimin dhe parkimin e automjeteve në disa nga rrugët kryesore të kryeqytetit.

Sipas njoftimit zyrtar, duke filluar nga ora 15:00 deri në përfundim të protestës, do të bllokohet qarkullimi në bulevardin “Dëshmorët e Kombit”, në segmentin nga “Ura e Dajtit” deri te rruga “Ismail Qemali”. Po ashtu, do të ketë kufizime edhe në rrugët “Ukraina e Lirë”, “Papa Gjon Pali II” dhe “Ismail Qemali”.

Autoritetet bëjnë me dije se, në varësi të ecurisë së protestës, mund të ndërmerren masa shtesë, duke përfshirë bllokime të tjera të përkohshme në akse të ndryshme rrugore.

Policia u bën thirrje qytetarëve të shmangin lëvizjet në këto zona gjatë orareve të përcaktuara dhe të përdorin alternativa të tjera për qarkullimin në qytet.