Panik te ‘Ali Demi’, bie zjarr në kompleksion ‘Kadiu’

Një incident i rrezikshëm ka tronditur mbrëmjen e djeshme zonën e Ali Demi në Tiranë, ku një zjarr i papritur përfshiu një nga godinat e kompleksit rezidencial “Kadiu”. Flakët u shfaqën në një prej pallateve të ndërtuara nga kompania “Kontakt”, në pronësi të biznesmenit Fatmir Bektashi, duke shkaktuar panik mes banorëve.

Sipas dëshmive nga vendngjarja, burimi i zjarrit dyshohet të ketë qenë kabina e automateve elektrike të ndërtesës. Brenda pak minutash, tymi i dendur u përhap në hapësirat e përbashkëta, ndërsa sistemi i alarmit aktivizoi evakuimin e menjëhershëm të banorëve. Familje të tëra, përfshirë edhe fëmijë, dolën me nxitim jashtë për të shmangur rrezikun.

Situata u komplikua nga vështirësitë në ndërhyrjen e shërbimeve të emergjencës. Sipas banorëve, hyrja në kompleks ishte e bllokuar, duke penguar lëvizjen e zjarrfikëses dhe ambulancës në kohën e duhur. Kjo ka ngritur shqetësime serioze për aksesin dhe organizimin e hapësirave të brendshme.

Banorët kanë reaguar me kritika të forta ndaj standardeve të sigurisë në kompleks, duke theksuar se rrugët e brendshme nuk plotësojnë kushtet minimale për qarkullimin e mjeteve të emergjencës në raste kritike. Sipas tyre, kjo situatë mund të kishte pasoja edhe më të rënda nëse zjarri do të përhapej më tej.

Kompleksi rezidencial “Kadiu” ndodhet ende në fazë përfundimtare ndërtimi, ndërsa një pjesë e apartamenteve janë banuar vetëm prej pak muajsh. Ngjarja ka rikthyer në vëmendje rëndësinë e kontrollit të standardeve të sigurisë dhe funksionimit të infrastrukturës përpara se objektet të bëhen plotësisht funksionale.