Përjashtimi i mbështetësve të Salianjit, anëtarët i shkojnë në seli Berishës

Tensionet brenda Partisë Demokratike janë zhvendosur në selinë qendrore, ku përfaqësues nga Durrësi kanë kërkuar sqarime direkte nga lidershipi. Kreu i grupit të këshilltarëve demokratë, Dritan Burgija, së bashku me sekretarin e degës, Arlind Boshku, janë paraqitur në seli për të kundërshtuar vendimin për përjashtimin e tyre.

Dy demokratët e cilësojnë vendimin si të padrejtë dhe në shkelje të statutit të partisë, ndërsa kërkojnë një ballafaqim të drejtpërdrejtë me kryetarin e PD-së, Sali Berisha.

Në një deklaratë për mediat, Burgija theksoi se për të kjo nuk është çështje postesh, por dinjiteti personal dhe politik. Ai rikujtoi edhe qëndrimin e tij në vitin 2021, kur kishte dalë publikisht në mbrojtje të Berishës, ndërsa sot – sipas tij – kërkon të njëjtin standard për veten.

“Duam shpjegime për përjashtimin tim dhe të kolegut tim. Çdo rresht i vendimit është anti-statut. Kemi kërkuar fakte dhe prova për këtë vendim dhe një ballafaqim të hapur me zotin Berisha, pasi akuzat janë shumë të rënda,” u shpreh ai.

Burgija hodhi poshtë kategorikisht pretendimet për bashkëpunim me PS, duke i cilësuar si të pavërteta.

“Nuk kemi bashkëpunuar me PS. Është një gënjeshtër e madhe. Çështja e përmendur lidhet me një pronë private, për të cilën disponoj dokumentacion të rregullt. Nëse ky është shkaku, atëherë është bërë një gabim i rëndë,” deklaroi ai.

Gjithashtu, ai u ndal edhe te dinamika brenda partisë, duke përmendur ndikimin që, sipas tij, ka pasur një takim i organizuar nga Ervin Salianji në Durrës, që – sipas Burgijës – ka vënë në lëvizje strukturat e PD-së.

“Pas asaj foltoreje, deputetët dolën në terren duke thënë se qytetarët nuk po marrin pjesë në takime. Në fakt, u tregua e kundërta. Pse nuk vjen Berisha në Sukth?”, u shpreh ai.

Situata në PD vijon të jetë e tensionuar, ndërsa mbetet për t’u parë nëse lidershipi do t’i përgjigjet kërkesës për një përballje të drejtpërdrejtë me bazën në Durrës.