Plagosja në Shijak, arrestohet autori, policia zbardh detajet

Policia e Durrësit ka vënë në pranga autorin e dyshuar të plagosjes me armë zjarri të ndodhur në Shijak. Lajmi u konfirmua nga drejtori i Drejtorisë Vendore të Policisë Durrës, Ervin Hodaj, gjatë një komunikimi zyrtar për mediat.

Sipas tij, në pranga ka rënë shtetasi Elton Beqiri, i cili dyshohet si përgjegjës për veprën penale “plagosje e rëndë me dashje”. Kapja e tij erdhi pas një angazhimi të koordinuar të strukturave policore, ku një rol të rëndësishëm ka luajtur edhe bashkëpunimi me familjarët e të dyshuarit. Autoritetet bëjnë me dije se gjatë operacionit të arrestimit nuk është hasur rezistencë.

Ngjarja ndodhi pasditen e së dielës në lagjen “Laguna” në Shijak, ndërsa hetimet paraprake tregojnë se konflikti mund të ketë lindur për motive të dobëta.

Gjatë konferencës për shtyp, drejtori Hodaj prezantoi edhe bilancin e punës së Policisë së Durrësit për muajin maj. Sipas të dhënave, gjatë kësaj periudhe janë evidentuar 383 vepra penale, nga të cilat janë zbardhur 382. Në kuadër të operacioneve policore, 117 persona janë arrestuar, 302 janë proceduar në gjendje të lirë dhe 15 të tjerë janë shpallur në kërkim.

Gjithashtu, janë zhvilluar 10 operacione të suksesshme, ku janë vënë në pranga 36 persona. Një pjesë e konsiderueshme e tyre lidhen me aktivitetin kriminal në fushën e narkotikëve, përfshirë raste të shpërndarjes së lëndëve narkotike pranë institucioneve arsimore në zonat e Shijakut dhe Kavajës.

Në lidhje me sezonin veror, policia ka hartuar një plan masash për menaxhimin e trafikut dhe rritjen e sigurisë rrugore. Sipas drejtuesve, do të përdoren edhe pajisje inteligjente për monitorimin dhe kontrollin e qarkullimit, me synim parandalimin e aksidenteve dhe lehtësimin e fluksit të lëvizjes.