Kompania e vetme në garë nuk paraqet ofertën

Procedura e tenderit për ndërtimin e portit të ri tregtar në Porto Romano është pezulluar pasi kompania e vetme pjesëmarrëse nuk dorëzoi ofertën financiare brenda afatit.

Mësohet se bëhet fjalë për kompaninë Archirodon, e cila nuk paraqiti dokumentacionin financiar deri më 9 mars, duke bërë që procesi i prokurimit të ndërpritet.

Tenderi, me vlerë të parashikuar prej rreth 400 milionë eurosh, kishte për qëllim ndërtimin e portit të ri tregtar në Porto Romano, një projekt kyç për zhvillimin ekonomik dhe përmirësimin e infrastrukturës portuale në vend.

Vendimi për pezullim erdhi pas kërkesave të vazhdueshme nga Shtetet e Bashkuara të Amerikës. Grant Van Cleeve, kreu i Dhomës Amerikane të Tregtisë në Tiranë, i kishte drejtuar pak ditë më parë një letër publike kryeministrit Edi Rama dhe zyrtarëve të lartë të qeverisë.

Ai vlerëson projektin e Porto Romanos si një mundësi që ndodh “një herë në 100 vjet” dhe kërkon shtyrjen e garës për të siguruar që Shqipëria të mbetet konkurruese në rajon.