Prezantohej me identitet të rremë, arrestohet 21-vjeçari në Tiranë

Përditësuar më 5 August 2025, 15:54

Policia e Tiranës ka vënë në pranga një 21-vjeçar të dyshuar për një sërë mashtrimesh ndaj qytetarëve, duke përdorur identitet të rremë. Arrestimi i tij u bë në kuadër të operacionit policor të koduar “Strategjia”, i zhvilluar nga Komisariati Nr. 2.

21-vjeçari nga Paskuqani Erjon Hoxha që mashtronte qytetarët, vajza e djem, duke u kërkuar para në formë borxhi, është arrestuar në flagrancë, në momentin kur shkoi për të marrë një shumë parash nga një 26-vjeçare, të cilën e kishte mashtruar edhe më parë.

I riu u shpall në kërkim pas mashtrimeve të njëpasnjëshme të denoncuara në redaksinë tonë. Ai u bë i njohur për listën e mashtrimeve të tij pasi viktima kishin rënë disa vajza që u kishte marrë shuma parash apo edhe varëse floriri dhe iu kishte shitur, e po ashtu një sërë borxhesh të tjera disa bizneseve në Tiranë.

Por jo vetëm kaq pasi 21-vjeçari është kallëzuar në polici edhe nga pronari i një hoteli në fshatin turistik Palasë, pasi është larguar pa kryer pagesën prej 450 eurosh.

Pas kallëzimit të bërë nga viktima, Policia nisi hetimet dhe identifikoi autorin, i cili, duke u paraqitur me emër dhe profil të rremë, kishte arritur të fitonte besimin e saj dhe t’i përfitonte disa shuma parash.

Gjatë ndjekjes së rastit, uniformat blu organizuan operacionin “Strategjia” dhe finalizuan kapjen e të dyshuarit, i cili u ndalua në momentin që po përpiqej të përfitonte një shumë tjetër nga e njëjta shtetase.

Hetimet po vijojnë për të identifikuar raste të tjera të ngjashme ku 21-vjeçari mund të ketë përdorur të njëjtën metodë mashtrimi për të përfituar para nga qytetarët.