Princ Leka del në mbështetje të studentëve: Të dëgjohet zëri i të rinjve

Princ Leka, trashëgimtari i Fronit Mbretëror, ka dalë në mbështetje të studentëve që protestojnë në Shqipëri, ndërsa ka shprehur shqetësimin për raportimet mbi trajtimin e të rinjve dhe të miturve nga efektivët e policisë.

Në një deklaratë publike, Oborri Mbretëror vë në dukje se denoncimet për dhunë dhe keqtrajtim lidhen me disa momente të ndërhyrjeve policore, nga shoqërimi i protestuesve në rrugë deri te qëndrimi i tyre në komisariate. Për këtë arsye, kërkohet që institucionet përgjegjëse të verifikojnë çdo rast dhe të garantojnë që personat e përfshirë në shkelje të japin llogari para ligjit.

Reagimi përmban gjithashtu një apel drejtuar Policisë së Shtetit për të ushtruar detyrën me profesionalizëm dhe vetëpërmbajtje. Sipas Oborrit Mbretëror, roli i uniformave blu duhet të jetë garantimi i sigurisë së qytetarëve dhe jo krijimi i frikës apo shtimi i përplasjeve përmes forcës së tepruar.

Thirrje për dokumentimin e rasteve dhe përgjegjësi ligjore

Në deklaratë theksohet se pamjet filmike dhe fotografitë e publikuara nga zhvillimet në terren mund të shërbejnë për të hedhur dritë mbi incidentet e denoncuara. Institucioneve u kërkohet të mos i anashkalojnë këto prova, por t’i shqyrtojnë ato në përputhje me procedurat ligjore.

Oborri Mbretëror u bën thirrje gjithashtu studentëve që shqetësimet dhe përvojat e tyre t’ua përcjellin edhe organizmave dhe komunitetit ndërkombëtar. Sipas deklaratës, informimi duhet të mbështetet te fakte të verifikueshme dhe dëshmi të sakta, në mënyrë që situata të pasqyrohet me përgjegjësi dhe zëri i të rinjve të mos mbetet pa u dëgjuar.

Megjithatë, reagimi nuk kufizohet vetëm te sjellja e autoriteteve. Oborri Mbretëror nënvizon se e drejta për protestë nuk duhet të shoqërohet me akte dhune apo dëmtime të pronës private, duke i konsideruar këto veprime të papranueshme dhe të dëmshme për kauzën e protestuesve.

Në përfundim, apeli është për uljen e tensioneve, hapjen e rrugës për dialog dhe respektimin e të drejtave themelore. Sipas Oborrit Mbretëror, mbrojtja e të rinjve, garantimi i lirisë së protestës dhe përgjegjësia për çdo shkelje duhet të jenë në qendër të reagimit institucional.