Proda tentoi ta ‘përvëlonte’, Aida Hajnaj merr postin e ri në Policinë e Shtetit

Ish-drejtuesja e Byrosë Kombëtare të Hetimit, Aida Hajnaj, është emëruar në krye të Departamentit të Teknologjisë së Informacionit në Policia e Shtetit, duke rikthyer kështu praninë e saj në strukturat drejtuese të këtij institucioni.

Emërimi i saj vjen pas një procesi ligjor që lidhej me mosrikthimin në detyrë sipas përcaktimeve të ligjit për Policinë e Shtetit. Sipas këtij ligji, pas përfundimit të mandatit në një funksion të caktuar, zyrtarët duhet të rikthehen në pozicionin e mëparshëm. Në këtë rast, moszbatimi i këtij parimi nga ish-drejtuesi i policisë, Ilir Proda, çoi në një përplasje ligjore.

Hajnaj iu drejtua Gjykatës Administrative, duke kundërshtuar procedurat e ndjekura, dhe kjo lëvizje rezultoi në anulimin e garës për disa poste drejtuese në Policinë e Shtetit.

Ajo ishte emëruar në krye të BKH-së në korrik të vitit 2020 dhe qëndroi në këtë detyrë deri më 1 shtator 2025. Para këtij pozicioni, Hajnaj ka mbajtur funksione të rëndësishme në Policinë e Shtetit, përfshirë postin e zëvendësdrejtores që prej vitit 2018, si dhe drejtimin e Departamentit për Kufirin dhe Migracionin.

Ndërkohë, drejtimi i Byrosë Kombëtare të Hetimit i është besuar Joni Keta, i cili merr kështu në dorë një nga institucionet kyçe të hetimit në vend.