Prokuroria e Tiranës “zbyth” Edi Ramën për çështjen e pagave

Pagat e prapambetura të muajit gusht për prokurorët dhe oficerët e Prokurorisë së Tiranës janë kaluar përfundimisht në llogaritë bankare pasditen e sotme.

Pagesat, të cilat duhej të ekzekutoheshin brenda datës 5 shtator, u vonuan për disa ditë për shkak të përplasjes institucionale mes sistemit të drejtësisë dhe qeverisë lidhur me rritjen e pagave të magjistratëve.

Përplasja për pagat e magjistratëve

Kriza nisi pas vendimeve të Këshillit të Lartë Gjyqësor (KLGJ) dhe Këshillit të Lartë të Prokurorisë (KLP) për rritjen e pagës referuese të magjistratëve, në zbatim të vendimeve të mëparshme të Gjykatës Kushtetuese. Këto vendime u morën pasi Kuvendi nuk ndërhyri brenda afateve ligjore.

Ministria e Financave dhe Dega e Thesarit bllokuan ekzekutimin e fondeve, me argumentin se organet e drejtësisë nuk kishin kompetencë të përcaktonin vetë nivelin e pagave.

Situata solli reagime të forta nga shoqatat e magjistratëve, të cilat kërkuan zhbllokimin e menjëhershëm të pagesave.

Kuvendi miratoi formulën e re më 17 shtator

Në përpjekje për të zgjidhur ngërçin, më 17 shtator mazhoranca parlamentare miratoi me procedurë të përshpejtuar një projektligj të ri për pagat e magjistratëve.

Formula e miratuar parashikon një rritje prej rreth 2%, nivel që, sipas përllogaritjeve të paraqitura, është pothuajse dhjetë herë më i ulët se rritja e parashikuar nga vendimet e KLGJ-së dhe KLP-së.

Megjithëse pagat e gushtit për punonjësit e Prokurorisë së Tiranës janë tashmë të likuiduara, përplasja mes institucioneve pritet të vijojë në rrugë ligjore dhe kushtetuese.