Protesta e opozitës, 4 persona në pranga, 6 të tjerë procedohen

Katër persona kanë përfunduar në pranga, ndërsa gjashtë të tjerë po hetohen në gjendje të lirë, pas incidenteve të shënuara gjatë protestës së opozitës që u mbajt një ditë më parë para Kryeministrisë.

Pas përfundimit të fjalimit të kryetarit të Partisë Demokratike, Sali Berisha, situata u tensionua, teksa disa protestues hodhën bomba molotov drejt hyrjes së godinës, duke shkaktuar zjarr në ambientet e jashtme.

Gjatë zhvillimeve u regjistruan edhe përplasje mes protestuesve dhe forcave të rendit. Si pasojë e shpërthimeve, dy punonjës policie mbetën të lënduar, ndërsa një mbështetës i opozitës u përfshi nga flakët e lëndës djegëse dhe mori dëmtime.

Autoritetet vijojnë hetimet për të zbardhur plotësisht rrethanat e ngjarjes dhe për të identifikuar personat përgjegjës.