Putin ultimatum Trump-it: Zgjidh, Rusinë ose Europën

Presidenti rus Vladimir Putin i ka dërguar një mesazh të qartë homologut amerikan Donald Trump: sipas tij, paqja globale nuk mund të arrihet pa një zgjedhje të prerë, Rusia ose Europa.

Tonet e forta të përdorura nga Kremlini nuk janë shprehje emocionale, por një sinjal strategjik për Uashingtonin. Analistët theksojnë se pas ndërhyrjes së udhëheqësve europianë, situata ka ndryshuar dhe planet e reja të dialogut nuk e kënaqin Rusinë.

Putin ka kritikuar shpesh planin amerikan prej 28 pikash, i prezantuar si version modern i propozimeve të tij gjatë takimit të famshëm me Trump në Alaska, duke vënë në dukje se Europa dhe Ukraina nuk e kanë respektuar atë. Nga perspektiva e Kremlinit, prania europiane në bisedime pengon interesat ruse dhe e bën të nevojshme një rishikim të marrëdhënieve ndërkombëtare.

“Pa ndikimin europian, Rusia ka mundësi më të mëdha për të konsoliduar të ardhmen e saj. Partneritetet me Kinën dhe Indinë po forcohen, tregtia po rritet, dhe sovraniteti teknologjik po përparon,” tha një zyrtar i lartë rus.

Ish-ambasadori Aleksandr Yakovenko, tani rektor i Akademisë Diplomatike, shpjegon se qëllimi i Moskës është të krijojë një distancë të madhe midis SHBA-ve dhe asaj që Putini e quan “Perëndimi kolektiv”. Nga kjo perspektivë, Trump mund të rigjallërojë rolin e Amerikës duke sfiduar aleancën atlantike, e cila sipas Moskës është bërë një pengesë për interesat amerikane.

Në këtë kuadër, mesazhi i Kremlinit ka karakter ultimativ: Trump duhet të vendosë në favor të Rusisë dhe të marginalizojë Europën, përndryshe partneriteti strategjik do të kërcënohet, dhe kontinenti i vjetër do të shihet nga propaganda ruse si mbështetës i “nazistëve ukrainas”.

Në thelb, Kremlini po përpiqet të riformatojë hierarkinë globale sipas interesave të veta, duke e detyruar partnerin amerikan të marrë një vendim të qartë në lojën ku Europa nuk ka vend.