Regjimi i jep PD 90% të kohës televizive për të sharë e sulmuar

Autoriteti i Mediave Audiovizive (AMA) ka publikuar raportin mujor mbi shpërndarjen e kohës televizive për partitë politike në televizionet kombëtare, për periudhën 1 – 31 gusht 2025. Të dhënat tregojnë një dominim të dukshëm të Partisë Demokratike të Shqipërisë (PDSh), e cila ka zënë plot 90.20% të kohës televizive të dedikuar politikës.

Në vend të dytë renditet Partia Socialiste (PS) me vetëm 4.81%, duke treguar një prezencë shumë të kufizuar në raport me rivalët e saj. Ndërkohë, Partia e Lirisë (PL) ka pasur një hapësirë prej 3.17%, ndërsa më pak e favorizuara ka rezultuar Partia Republikane Shqiptare (PR), e cila është përfaqësuar me vetëm 1.81% të kohës.

Ky shpërndarje e pabarabartë ngre pikëpyetje mbi balancën e informimit politik në median kombëtare dhe përputhjen me parimin e pluralizmit mediatik, që është i sanksionuar si nga ligji për mediat audiovizive, ashtu edhe nga praktikat demokratike. Përfaqësues të opozitës kanë reaguar shpesh duke e cilësuar ndarjen e kohës televizive si tregues të njëanshmërisë editoriale, ndërsa mbështetës të qeverisë pretendojnë se koha e transmetuar lidhet drejtpërdrejt me aktivitetin politik real të partive gjatë muajit.

Raporti i AMA-s, ndonëse teknik, merr një ngarkesë të fortë politike në prag të një viti zgjedhor, ku kontrolli mbi hapësirën mediatike konsiderohet si një nga faktorët më ndikues për formësimin e opinionit publik.