Robert Berisha: Ka bërë gabim nëse janë bërë videot +18 për përfitime

Robert Berisha ka reaguar për publikimin e videove intime që kanë tronditur së fundmi showbiz-in shqiptar, duke dënuar çdo përdorim të materialeve private për përfitim. Këngëtari theksoi gjithashtu presionin dhe pasojat më të rënda që përballojnë gratë në raste të tilla.

Këngëtari Robert Berisha ka komentuar zhvillimet e fundit që kanë përfshirë showbiz-in shqiptar, në një kohë kur publikimi i videove intime është kthyer në një prej temave më të diskutuara.

I ftuar në emisionin “Ndryshe” në Top Albania Radio, Berisha u pyet për skandalin dhe mënyrën se si po trajtohet publikisht çështja. Sipas tij, vëmendja e vazhdueshme ndaj materialeve intime mund ta zgjasë edhe më shumë një situatë që tashmë ka shkaktuar reagime të shumta.

Berisha u shpreh se në raste të tilla gratë përballen shpesh me një barrë më të madhe sociale dhe emocionale. Ai vuri në dukje se presioni, paragjykimi dhe pasojat që vijnë pas publikimit të materialeve private mund të jenë veçanërisht të rënda për to.

Duke iu referuar personit që dyshohet se ka realizuar videot intime, këngëtari tha se, nëse materialet janë regjistruar apo janë përdorur me qëllim përfitimi, një veprim i tillë është i gabuar.

“Unë shpesh e kam thënë që ‘ne lejleku nuk na ka sjellë’. E kanë bërë shumë të madhe. Nuk është mirë që ka ndodhur. Nëse e ka bërë për përfitime, ka bërë shumë keq. Edhe nëse është si ndonjë sëmundje që ka qejf me i pasur për vete ato xhirime dhe mos me ia treguar dikujt tjetër, prapë është gabim”, deklaroi Robert Berisha.

Ai solli në vëmendje edhe një rast të ngjashëm të ndodhur disa vite më parë në Kosovë, ku ishte përfshirë një ish-pjesëmarrëse e “Big Brother”.

Reagimi i Robert Berishës vjen në një moment kur çështja e publikimit dhe shpërndarjes së materialeve intime ka nxitur diskutime të shumta mbi privatësinë, përgjegjësinë dhe pasojat që mund të shkaktojë ekspozimi i jetës private në rrjet.