Rritet kontrolli, përcaktohen rregullat e reja për lojërat e fatit

Këshilli i Ministrave ka miratuar një vendim të ri që përcakton rregullat për administrimin dhe përdorimin e fondit të posaçëm të krijuar nga të ardhurat e lojërave të fatit. Nisma synon të forcojë kontrollin financiar, të rrisë transparencën dhe të garantojë përdorimin e saktë të fondeve për projekte të miratuara zyrtarisht.

Sipas vendimit, përgjegjësia për administrimin teknik dhe financiar të fondit i kalon Autoritetit të Mbikëqyrjes së Lojërave të Fatit. Ky institucion do të menaxhojë llogarinë bankare të fondit, do të kryejë verifikimin e të ardhurave dhe shpenzimeve, si dhe do të mbajë një regjistër të detajuar financiar.

Në të njëjtën kohë, përzgjedhja e projekteve që do të përfitojnë financim mbetet në kompetencë të Këshillit të Mbështetjes së Projekteve, duke ndarë kështu funksionet administrative nga ato vendimmarrëse.

Fondi krijohet nga të ardhurat e përcaktuara në legjislacionin për lojërat e fatit dhe mund të përdoret vetëm për projekte të miratuara. Çdo pagesë do të realizohet përmes sistemit bankar dhe vetëm mbi bazën e dokumentacionit të plotë financiar dhe kontratave përkatëse.

Vendimi parashikon gjithashtu një bashkëpunim të ngushtë mes Autoritetit të Mbikëqyrjes së Lojërave të Fatit dhe administratës tatimore, me qëllim verifikimin e saktësisë së deklarimeve dhe pagesave nga subjektet që kontribuojnë në fond.

Në funksion të transparencës publike, institucioni përgjegjës do të publikojë në mënyrë periodike të dhëna mbi të ardhurat, shpenzimet, përfituesit e fondeve dhe raportin vjetor të administrimit.

Rregullorja e re ndalon përdorimin e fondeve për shpenzime që nuk lidhen drejtpërdrejt me projektet e miratuara, si dhe eliminon mundësinë e financimit të dyfishtë nga burime të tjera buxhetore për të njëjtin qëllim.

Në rast të shkeljeve, autoriteti ka të drejtë të pezullojë pagesat, të kërkojë kthimin e fondeve dhe të ndërpresë kontratat e financimit, duke ndjekur procedurat ligjore për rikuperimin e detyrimeve.

Vendimi i ri, i propozuar nga Ministria e Financave, do të hyjë në fuqi pas publikimit në Fletoren Zyrtare.