Gropa financiare me 139.8 milionë lekë deficit dhe 215 milionë lekë të paarkëtuara nga tarifa 

Kërkohet rritja e pagesës që qytetarët japin në faturën e dritave

Prej vitesh rezulton se gjigandi televiziv në Shqipëri ndodhet në një situatë financiare jo të mirë. Edhe pse asetet e tij apo vetë struktura janë përdorur për të ndërtuar me dhjetëra televizione private, duke u plaçkitur, grabitur, vjedhur apo keqpërdorur, sot është në vështirësi ekonomike dhe në një faturë të lartë borxhesh.

Dy subjektet të cilave RTSH u detyrohet t’u shlyejë borxhe të larta janë Federata Shqiptare e Futbollit dhe UEFA, federata europiane e futbollit. Por, pa munguar këtu, është edhe një kredi prej 18 milionë eurosh që ia ka Ministrisë së Financave.

Në raportin financiar të RTSH-së për 2025 thuhet fjalë për fjalë se rritja e të ardhurave nga tarifa e shërbimit do të jetë një mënyrë nga ku do të arkëtohen të ardhurat për të shlyer detyrimet.

“Vetëm detyrimet ndaj FSHF dhe UEFA përbëjnë rreth 59% të detyrimeve ndaj furnitorëve. Ky nivel i lartë i detyrimeve lidhet me kontraktimin e të drejtave sportive me kosto të konsiderueshme, të cilat janë planifikuar të mbulohen kryesisht nga rritja e të ardhurave nga tarifa e aparatit televiziv ose nga financimi shtesë buxhetor” – thuhet në dokumentin e siguruar nga WebLajm.com.

Dhe pikërisht kjo fjali ngre një pikëpyetje të madhe: Ku shkon tarifa që paguajnë shqiptarët në faturën e dritave?

Tarifë të cilën e paguan me detyrim çdo individ apo subjekt që ka një kontratë me operatorin e shpërndarjes së energjisë elektrike.

Një tarifë e cila është 100 lekë, por që në arkën e RTSH-së rezulton se afro 215 milionë lekë nuk janë arkëtuar përgjatë vitit 2025!

• 214.9 milionë lekë mungesë nga të ardhurat e tarifës së aparatit televiziv.

Nuk kanë paguar shqiptarët dritat, apo arkëtimet e kryera dikush ka harruar t’ia japë RTSH-së, duke i përdorur edhe për të tjera qëllime, pa dashur të themi se…..

Më tej, bordi drejtues kërkon edhe rishikim të tarifës, e cila sipas tyre është e ulët dhe është vendosur 15 vite më parë, me 100 lekë në muaj apo 1200 lekë në vit.

“Megjithatë, qëndrueshmëria financiare e institucionit mbetet e ndikuar nga dy elementë strukturorë:
· tarifa e aparatit televiziv, e cila mbetet në nivelin 1200 lekë/vit dhe nuk është rishikuar që nga viti 2011;
· përqindja e mbajtur nga OSHEE për arkëtimin e tarifës, aktualisht 10%, ndërkohë që RTSH ka kërkuar vazhdimisht uljen e saj në 2%”.

Por kjo është vetëm një nga situatat kritike ku ndodhet RTSH, e cila pranon se ekonomikisht është një subjekt tregtar i falimentuar, me një deficit të konsiderueshëm.

“Vlerësimi i përgjithshëm i situatës financiare. Në kushtet kur RTSH përballet me rritje të vazhdueshme të kostove operative, veçanërisht për: · fondin e pagave, · projekte programore, · blerjen e të drejtave sportive, · shërbime mirëmbajtjeje, mosrealizimi i plotë i të ardhurave të planifikuara ka krijuar vështirësi në menaxhimin e likuiditetit dhe në përmbushjen në kohë të detyrimeve financiare”./weblajm