Salianji e thotë troç: Do kandidoja për Tiranën, ja kush më ndaloi

Ish-deputeti i Partisë Demokratike, Ervin Salianji, ka deklaruar se do të ishte i gatshëm të kandidonte për Bashkinë e Tiranës, nëse do t’i ofrohej një mundësi e tillë, por tha se ligji ia ndalon një gjë të tillë për shkak të dënimit penal që ka marrë më herët.

I ftuar në Euronews Albania, Salianji u shpreh mbështetës i fortë i kandidaturës së Florjan Binajt, duke e cilësuar si një zgjedhje të veçantë dhe të pavarur nga partitë.

“Sigurisht që do të kandidoja, por nuk është kjo tema sot. Pastaj ju e dini që mua mi kanë ndaluar këto gjëra. Mi ka ndaluar ligji”, tha Salianji.

Ai nënvizoi se zgjedhjet e pjesshme në kryeqytet janë një mundësi e rrallë që qytetarët të vendosin përballë pushtetit një alternativë të ndryshme:

“Florjan Binaj është kandidat i jashtëzakonshëm. Përtej betejës për qytetin, është një betejë politike e fortë. Një test, një mundësi e jashtëzakonshme që kryeqyteti për herë të parë bën zgjedhje të pjesshme. Çdo kryeqytet ku sundojnë autokratët, ka fituar opozita…”, u shpreh ai.

Salianji shtoi se kandidatë të pavarur dhe jo politikë mund të frymëzojnë qytetarët për më shumë liri, barazi dhe kontroll ndaj pushtetit.