Sarandë/ Ushtruan dhunë ndaj 52-vjeçarit, arrestohet njëri nga autorët

Një 37-vjeçar u arrestua nga policia e Sarandës si i dyshuar për një plagosje të ndodhur pasditen e së premtes në këtë qytet. i arrestuari është Diomet Musait 37 vjeç, ndërkohë që është shpallur në kërkim nipi i tij, Markeljan Musai 29 vjeç.

“Falë veprimeve të shpejta të Specialistëve për Hetimin e Krimeve në Komisariatin e Policisë Sarandë, u lokalizua në një banesë në fshatin Lukovë, ku po fshihej, dhe u arrestua shtetasi D. M., 37 vjeç, me precedent kriminal në krimet ndaj personit. Ndërkohë, vijon kërkimi për kapjen e shtetasit M. M., 29 vjeç.

Dy autorët, xhaxha dhe nip, dyshohen se më datë 21.02.2025, rreth orës 16:10, në vendin e quajtur “Rruga për në Heremec”, në lagjen nr. 3, Sarandë, për motive të dobëta, kanë goditur me grushte, shkelma dhe sende të forta shtetasin S. Ç., 52 vjeç, duke i shkaktuar dëmtime të rënda.

Shërbimet e Policisë po vijojnë punën për kapjen e 29-vjeçarit të shpallur në kërkim si bashkëautor.

Materialet u referuan Prokurorisë për veprën penale “Plagosje e rëndë me dashje” e kryer në bashkëpunim”, njoftoi Policia.