Shërbimi Social i vjen në ndihmë 33-vjeçares dhe i lë kujdestarinë e fëmijëve

Shërbimi Social pranë Bashkisë së Durrësit ka vendosur të mos i heqë kujdestarinë nënës së tre fëmijëve të mitur, e cila një ditë më parë ishte akuzuar nga ish-vjehrra e saj për braktisje dhe mungesë përgjegjshmërie ndaj fëmijëve.

Pas shqyrtimit të rastit nga Grupi Teknik i ngritur pranë shërbimit social, u vendos që fëmijët të qëndrojnë pranë nënës, ndërkohë që janë marrë një sërë masash emergjente për përmirësimin e kushteve të jetesës dhe kujdesit shëndetësor.

Ndërhyrjet e menjëhershme kanë përfshirë sigurimin e ushqimeve, veshmbathjeve dhe medikamenteve të nevojshme për trajtimin e fëmijëve, të cilët ndodhen nën kujdes mjekësor në spital. Dezinfektimi i banesës është marrë përsipër nga dy organizata joqeveritare aktive në fushën sociale.

Sipas planit të ndërhyrjes, janë parashikuar masa konkrete si krijimi i kushteve higjieno-sanitare për familjen, dezinfektimi i ambientit të banimit, mbulimi i shpenzimeve për medikamente, si dhe vendosja e masës së mbikëqyrjes së specializuar në familje. Po ashtu, do të ofrohet program prindërimi dhe këshillim psikologjik për nënën dhe fëmijët.

Ndihma materiale për familjen përfshin sigurimin e veshmbathjeve për tre fëmijët, pako ushqimore dhe produkte higjieno-sanitare. Gjithashtu, nëna është orientuar për transferimin e gjendjes civile në qytetin e Durrësit, me qëllim përfitimin e shërbimeve sociale, si aplikimi për fondin e veçantë, strehim social apo bonus qiraje.

Sipas autoriteteve vendore, rasti do të vijojë të monitorohet nga strukturat përkatëse, me qëllim garantimin e sigurisë, mirëqenies dhe interesit më të lartë të fëmijëve.